Tyson-a'n Jake Paul a beng!

Boxer ropui leh rothap Mike Tyson-a'n sum a nei leh vak tawh lo a ni mai thei - vawiin hian Jake Paul nen AT&T Stadium, Arlington, Texas-ah an inhnek dawn a, hemi hmaa media an hmachhawn hnuhnung berah Tyson hian Jake Paul hi a beng!

YouTuber a nih hnua professional boxing luchilhtu Jake Paul hian tun hnaiah ṭawngkamin Tyson hi a bei fo a, a vanglaia boxer rothap hian a bei let lo - Texas-a an inhmuh meuh chuan kut a thlak lo thei lo a ni ber.

Boxer pahnih inhnek hi tukin zing dar 6:30 aṭangin en theih tura pekchhuah a ni dawn a, mahse, inhnek dang a awm nual avangin Tyson leh Paul inhnek tur hi zing dar 9:30 velah a chhuah chauh rin a ni - television lamah a en theih dawn lo a, Netflix lamah en tur a ni ang.

A tawk ta e

Tyson chuan, "Ṭawng reng rikngawt hun chu a tawp ta," a ti a, hetihlai hian Jake Paul erawh nui chungin a ṭhu - Tyson-a ben chu na a tih loh thu a sawi a, boxer ropui chu a knockout tur thu a sawi zui!

Kum 27 mi Jake Paul chuan, "Min ben kha na ka ti lo hrim hrim. A thinrim ve a nih kha - pa te tak tê thinrim ve mai a ni," a ti a, Tyson a chung en duh lo! Tyson hi 5ft 8in a nih laiin Jake Paul hi 6ft 1in a ni thung a, an insan hleih hle.

Jake Paul chuan Tyson hi vau zuiin, "Min ben dan kha a 'cute' khawp mai. Mahse maw bawiha, naktukah chuan ka knockout dawn che a ni," a ti a, a thutiam a hlen leh hlen loh kan hre thuai ang.

Insual duh

Kum 58 mi a ni tawh a, Tyson-a'n kum 27 mi lek Jake Paul a hnek tur hi tam takin an sawisel. Khawvela boxer ropui ber pawl ni mah se, a fight hnuhnung pangaa vawi thum tlawm Tyson hi a kum nena enin a ropui tawk tawh lo ang tih a chiang.

Mahse, sum a tam miau a, hei hi a inhnek chhan niah tam takin an ngai. Mahse, Tyson chuan, "Sum hi ka tan engmah lo mai a ni. Kei chu mipa ka ni a, thil hlauhawm hmaa dinchhuah ka duh. A chang chuan eng ang chiah nge ka nih inhriat ka châk a, khawvel hmaa inlan hi ka duh a ni.

"Kum 14 ka nih aṭangin hei lo hi hriat ka nei ve lo. He fight aṭanga ka sum hmuh tur hi ka tan a tawk lo - inhnek ka duh a ni mai," a ti - Tyson hian dollar maktaduai 20 vel a hlawh dawn nia sawi a ni a, a khingpui tur Jake Paul hian dollar maktaduai 40 vel a hlawh ang.

Inthlauhna

Tyson hian vawi 58 fight hmachhawn tawhin vawi 50 a chak a, vawi ruk a tlawm a, vawi hnih 'no contest' ah puan a ni thung. WBA, WBC leh IBF heavyweight champion ni tawh a ni a, "Iron Mike" hming lem meuh an pek a ni.

'Khawvela pa kawlhrawng ber' tih hiala hminglem an pek hian Jake Paul hi a hlau chhin dawn eih lo - mahse, an inkarah kum 31 a tla a, hei tak hi Tyson-a chak loh theihna tur a ni dawn tih a chiang.

Jake Paul hian vawi 11 fight hmachhawn tawhin vawi 10 hnehna a chang a, vawi khat a tlawm - chutihrual chuan boxer langsar pangngai tak a hmachhawn sawi tur an awm lo a, a hneh loh awmchhun hi vawi 10 fight a neiha chak vek Tommy Fury a ni.

A kalphung

Professional boxing-a an round khelh zat ṭhin hi round 12 niin, round tin hi minute thum zel inhnek tur a ni. Mahse, Tyson leh Jake Paul inhnek tur erawh round 12 a tling dawn lo a, a minute pawh tihtlem a ni.

Boxer pahnih hi round riat an inhnek dawn a, round tin hi minute hnih zel inhnek tur a ni bawk. Tyson-a tana pawimawh ber chu round tam an khelh hmaa Jake Paul hneh hi a ni ang - kum 58 mi hian round a khelh tam chuan, a aia ṭhalai zawk leh tha za zawk Jake Paul tan chance a ṭha dawn.

Professional boxing-ah 10-ounce glove hman ṭhin a ni a, hei hi 283 gram a ni a, mahse, vawiin inhnekah erawh 14-ounce glove hman tur niin, gram 396-a rit tihna a ni - hei hian inhnek na tak tur tlemin a veng deuh ang.