GIG Motors All Mizoram Inter Village Football veng langsar an chak

GIG Motors All Mizoram Inter Village Football Championship chu khelh chhunzawm zel a ni a, football veng langsar Bethlehem Vengthlang, Chanmari West, Chawnpui leh Melbuk ten an khingpui an hneh vek - goal an khung nual.

Bethlehem VT-in nimin khan Marpara hmachhawnin, Chite Veng khelmualah goal li an khung. BVT tan Lalmuankima chuan goal hnih khungin, B.Vanlalhriatrenga leh Enzo Paulianlal ten goal khat ve ve an thawh bawk a, 4-1 in an chak.

Chanmari West-in Zonuam lakah first half chhungin goal khung lo mah se, second half-ah Remruatfela leh K. Lalremsanga ten goal khat ve ve an khung a, 2-0 in hnehna an chang.

Chawnpuiin Reiek lakah zahngaihna an lantir lo - goal sarih ngawt an khung a, 7-2 in an chak. Reiek hian minute 10-na leka Chawnpui tana James Lalnunchhana goal hmahruai chu Zorinsanga leh Lalsiamtluanga hmanga chhangletin, 2-1 in hma an hruai.

Mahse, Reiek hian ngam loh chalah chil an hnawm a ni ber - Chawnpui tan Lalnunchana'n khung belhin, Ephraim Vanlalduhsaka, Amosa Vanlalruata, Rahul Sunar, T. Vanneihtluanga leh H. Lallianzama ten goal khat ṭheuh an khung ve leh a, 7-2 in chiang takin an chak.

Melbuk pawhin Zanlawn laka hnehna chang turin harsatna an tawk lo a, 4-0 in an chak. Lallawmsanga'n goal hnih khungin, Lalsawmzela (penalty) leh Lalhmunsiama ten goal khat ve ve an thawh bawk.

Tlangnuamin 5-1 in Bairabi Jt. VC an hneh a, Kiran Chhetri chuan goal hnih khungin Vanrammawia, C. Malsawmdawngkima leh Vanlaldinpuia ten goal khat ṭheuh an thawh bawk a, Sakawrtuichhun pawh Chhawrtui nen 1-1 a an inhnehtawk hnuah penalty hmangin, 5-3 in an chak.

Inter Village football hi kartawpah chawlh rih a ni dawn a, vawiin leh Inrinniah inkhel a awm dawn lo - Thawhṭanniah khelh chhunzawm leh chauh tur niin, 1st Bn MAP Ground, Armed Veng leh Chite Veng Playground bakah RG Stadium, Mualpuiah te khelh a ni tawh ang.