A chung bera kum tawp hmang tur Sabalenka

Hmeichhe tennis player zingah world number 1 ni chunga kumin kum tawp hmang tur a chiang ta - Aryna Sabalenka chuan a chung bera awm chungin thlasik chawlh a hman dawn a ni.

Belarus nula Sabalenka hian WTA Finals khelh zawh takah khan nomawi a chawi lo, mahse a elpui Iga Swiatek a che ṭha bik lo a, hei vang hian a chung berah a awm tlang theih phah.

Tun season chhungin Sabalenka hian Australian Open leh US Open nomawi a chawi a, number 1 nihna chu Swiatek hnen aṭangin a chhuhsak. Women's Tennis Association (WTA) ranking thar berah point 9416 a hmu a ni.

Hun rei tak chhung number 1 ni tawh Swiatek tan season ṭha tak a ni lo thung. French Open nomawi chu a chawi tho a, mahse Grand Slam dang pathumah a thleng sang lo vek a, season tawp lamah mimal harsatna vangin tournament khelh loh a nei nual bawk.

Kum 23 mi Swiatek hian WTA Tour 500 phei chu khelh tur zat bituk pawh a khel phak lo a, hei vang hian a ranking point hmuhsa pawh paihsak a ni. Tunah chuan coach thar a nei tawh a, beiseina nen season thar a thlir thei tawh ang.

Qinwen Zheng chu panganaah awm a, Chinese nula hian season duhawm a hmang. Zheng hian Paris Olympic gold medal a la, hei bakah hian Australian Open leh WTA Finals khelh zawh takah khan pahnihna a ni.