Inter Village Football - Vawiinah khelh ṭan a ni dawn ta

Mizoram football-ah veng leh khua inelnaten ngaihhlut an hlawh ṭhin a, boruak a sang viau zel - kuminah Mizoram Football Asssociation buatsaihin khelh a ni leh dawn ta a, vawiinah hian khelh ṭan a ni dawn.

Team 88 ngawtin Mizorama football thiam ber veng/khua nih an inchuh dawn a, vawi khat chak loha thla tam inbuatsaihna vui liam nghal theih a nih vangin team tin an ṭang - insiamṭha leh turin hun an nei dawn lo miau a, vawi khat chetsualin hma hun thui tak a hril thei.

GIG Motors All Mizoram Inter Village Football Championship 2024 hi khelmual pathum Rajiv Gandhi Stadium, Mualpui, 1st Bn MAP Ground, Armed Veng leh Chite Veng Ground-ah te khelh a ni dawn a, vawiinah pawh khelmual pahnihah inelna hi neih a ni dawn.

Dinthar inlan hun

Mizoram football-a hming dai thei lo, football thiam veng tia hriat hlawh, Mizoram Premier League champion hmasa ber club neitu ni bawk Dinthar chu vawiin chawhnu dar 2:00 hian an inlan dawn a, 1st Bn MAP Ground-ah Tuirial an hmachhawn ang.

Dinthar Vengin Mizoram football-a an hming ropui ṭhin kha chawi nun leh an tum dawn a, Tuirialin result danglam thlentir a, an kawng dalsak an lo tum dawn - an inkhelh hun hi boruak nawm lai tak a ni dawn a, a hmuna inkhel en duh tan pawh en a nawm vanglai tak a ni dawn.

1st Bn MAP Ground-ah hian vawiinah inkhel pathum a awm dawn a, zing lam dar 10:00-ah Central Jail Veng leh Chite Veng an inhmachhawn ang a, chhun dar 12:00-a Maubawk leh Falkawn inkhel tur pawh hmuhnawm tura beisei a ni.

Chite lam hawiin...

Vawiinah Chite khelmualah match thum en tur a awm dawn a, zing dar 10:00-ah Tuidam leh Hnahlan an inkhel dawn a, he inkhela chak zawk hi round of 62-ah seeded team Farkawn chuan an lo hmuak ang.

Chawhnu dar 12:00-ah Chamring leh New Serchhip an intawng dawn a, Chite khelmuala inkhela chak zawk hian round of 64 lut sa Mamit Jt. VC an hmachhawn dawn bawk.

Rangvamual pawhin Mizoram football-a hming chher tumin inelna an hmachhawn dawn a, Dawrpui Vengthar an hmachhawn dawn - team pahnihin tlawm zawk nih an hreh ve ve dawn a, inkhel a hmuhnawm phianin a rinawm - he inkhela chak zawk hi Lungdaiin round of 64-ah an lo hmuak.

A kalphung

All Mizoram Inter Village Football Championship-ah hian team 88-in inelna an hmachhawn a, an zingah hian team 48 chu local council hminga tel niin, village council team 33 leh Jt VC team pasarih an tel.

Inrinni zan khan draw neih niin, LBS Suzuki All Mizoram Inter Village Football 2022-a round of 16 lut chinte chu seeded an ni - mahse, inelna hmasa zawka round of 16 lutte hi an tel vek loh avangin, seeded tur hi round of 16 lut aṭangin a hranpaa pawh leh a ni a, team pariat seeded an ni.

Tun inelnaah hian Lengpui, Republic, Salem Veng, Farkawn, Mamit Jt.VC, Lungdai, Armed Veng South leh Ramhlun North te chu seeded niin, first round khelh ngai loa round of 16 lut sa an ni - anni bakah hian 'draw' lama vannei team 'bye' an awm bawk.

Sum a tam

Mizoram pum huapa football thiam veng/khua zawnna inkhel a nih avangin lawmman pawh a hraw hle, Champion team hian a sum faiin cheng nuai hnih an dawng dawn a, hei bakah hian 'Sial' an kai haw thei ang.

Pahnihnain cheng nuai khat an hawn dawn a, semifinalist-a team vanduai zawk pahnihin Rs. 50,000 ve ve an dawng dawn bawk - Fairplay tan hian lawmman Rs. 50,000 a awm dawn a, team tana sum semchhuah tur ringawt hi Rs. 4,50,000 a ni dawn tihna a ni.

Hetihlai hian mimal lawmman pawh semchhuah tura ruahmanna siam a ni a, goal khung tam ber hian Rs. 10,000 dawngin, inelna neih chhunga khel ṭha ber 'Best Player' tan Rs. 10,000 tho dah a ni bawk.