Real Madrid an inlan ve tawh dawn e!
El Clasico-a an mualpho hnua an league match hmasa berah Real Madrid chu zanin dar 6:30 hian an inlan dawn a, tun season La Liga-a Barcelona la hnehtu awmchhun Osasuna an mikhual ang.
Carlo Ancelotti naute hi Barca laka an mualpho hnu khan Valencia khelmuala inlan tur a ni a, mahse, Valencia-a tuilian avangin an inkhel tur hi sawn a ni - zaninah an inlan dawn ta.
Pathianni zan dar 8:45-ah Atletico Madrid an inlan dawn a, anni hian khualmualah Real Mallorca an lenchilh dawn. Hetihlai hian hmahruaitu Barcelona chu Pathianni zan dar 1:30-ah an inlan dawn a, Real Sociedad an lenchilh ang.
Catalan club hian point kua ngawtin anmahni hnaih bertu Real Madrid an tlansan mek a, Real hian match khatin an khel tlem thung. Hansi Flick-a nauten an hmelma kumhlun nena an inkar tihzau zel an duh dawn.
Harh a hun e!
Real hian Santiago Bernabeu-ah ngei 4-0 ngawta Barcelona an ngam loh hnu lawkah chanchin lawmawm lo hriat tur an nei zui a, chu chu an player chhuanvawr, Ballon d'Or dawng ngei tura an ngaih Vinicius Jr-a'n khawvela footballer ṭha ber lawmman a dawn loh tur thu a ni.
Spanish champion hian an lawm loh thu uchuak takin an tilang zui a, Club of the Year-ah puan niin, Champions League leh La Liga champion puitu Carlo Ancelotti chu Coach of the Year-ah puan ni bawk mah se, Real aiawh tumah Ballon d'Or semnaah an kal lo!
Real lungawi lohna hi media tam tak chaw tui ber a ni nghal a, club lian ve tak khan an player pakhat an vuipui a ni ber - hemi hnu hian Champions League-ah AC Milan chu 3-1 ngawtin an ngam lo zui a, tunlai zet chu Real 'puja' a fuh lo!
Madrid khaw club hian an 'puja' fuh lo siamrem turin zaninah hun ṭha an nei dawn a, Osasuna an hneh theih chuan team boruak nguai lutuk pawh a zia sawt ang - an mikhual tur hian Barcelona an hneh tawh tih erawh theihnghilh lo la.
Barca ve thung
Real an nguai laiin an elpui Barca erawh an thlen chin apiangah an thawm a ring viau zel - an hma zawna mi an hneh zel a, Real an sawp hnuah Espanyol (3-1) chu league-ah an sawp zui a, Champions League-ah pawh Red Star Belgrade (5-2) lakah zahngaihna an lantir lo.
Serbian club hian Barca an ngam loh hnu lawkah Real an tih el zui a, "Hello Real, kan tlawm ve tho a ni mai thei a, keini chuan goal hnih kan khung thung..." an ti deuh kher a, Real Madrid tan a na khawp ang.
A tawi zawng chuan Barcelona laka goal khung theih chu intihtheihna a tling a, hei hian he team ṭhat tawkzia a hrilhfiah. Real Sociedad lakah pawh Flick-a naute hian harsatna an tawk lo tura ngaih a ni.
Barca tan Robert Lewandowski-a'n kum 36-ah vanglai a chen thar leh mek a, match 16-ah goal 19 leh assist vawi hnih a nei tawh. Raphinha hi sawi hmaih a thiang lo - match 16-ah goal 12 leh assist vawi 10 a nei tawh a, player pahnih hi Pathianni zanah Sociedad tan ven bik an fuh ang.
November 8, Zirtawpni Zan
Rayo Vallecano 01:30 AM Las Palmas
November 9, Inrinni Zan
Real Madrid 06:30 PM Osasuna
Villarreal 08:45 PM Alaves
Espanyol PSTP Valencia
Leganes 01:30 AM Sevilla
November 10, Pathianni Zan
Real Betis 06:30 PM Celta Vigo
Real Mallorca 08:45 PM Atletico Madrid
Getafe 11:00 PM Girona
Real Valladolid 11:00 PM Athletic Bilbao
Real Sociedad 01:30 AM Barcelona
Team Dinhmun
# Team Pld W D L GF GA GD Pts
1 Barcelona 12 11 0 1 40 11 29 33
2 Real Madrid 11 7 3 1 21 11 10 24
3 Atlético Madrid 12 6 5 1 18 7 11 23
4 Villarreal 11 6 3 2 20 19 1 21
5 Osasuna 12 6 3 3 17 16 1 21
6 Athletic Bilbao 12 5 4 3 18 12 6 19
7 Real Betis 12 5 4 3 12 10 2 19
8 Mallorca 12 5 3 4 10 9 1 18
9 Rayo Vallecano 11 4 4 3 12 10 2 16
10 Celta Vigo 12 5 1 6 18 20 −2 16
11 Real Sociedad 12 4 3 5 10 10 0 15
12 Girona 12 4 3 5 15 17 −2 15
13 Sevilla 12 4 3 5 12 17 −5 15
14 Alavés 12 4 1 7 14 19 −5 13
15 Leganés 12 2 5 5 12 16 −4 11
16 Getafe 12 1 7 4 8 10 −2 10
17 Espanyol 12 3 1 8 11 22 −11 10
18 Las Palmas 12 2 3 7 13 21 −8 9
19 Valladolid 12 2 2 8 9 24 −15 8
20 Valencia 11 1 4 6 8 17 −9 7