Atalanta an la tlawm lo

Europa League champion Atalanta-in season duhawm an hman an chhunzawm zel - Nilaini zan Champions League inkhelah VfB Stuttgart chu 2-0 in an hneh a, Ademola Lookman leh substitute Nicolo Zaniolo ten goal khat ve ve an khung.

Atalanta hi tun season Champions League match li an khelh tawhah an la tlawm lo - match hmasa berah Arsenal (0-0) inhnehtawkpuiin, khualmualah Shakhtar Donetsk (3-0) an sawp a, Celtic (0-0) an draw leh hnuin Stuttgart an hneh.

Italian club hi Serie A lamah pawh pathumna an ni mek a, league match 11 khelh tawhah hmahruaitu Napoli an phak lohna chu point thum chauh a ni. Champions League-ah match li khelh tur la neiin, Young Boys (away), Real Madrid (home), Sturm Graz (home) leh Barcelona (away) te an la hmachhawn leh dawn.

Atalanta manager Gian Piero Gasperini chuan, "Champions League khel turin Stuttgart kan pan a, chu hmunah chuan hnehna hlado kan chham. Kan tan chuan inkhelh harsatna hmun aṭanga point thum hmuh hi a hlu.

"UCL-ah hian beisei nei lo ni ila inkhelhin awmzia a nei lo ang, chuvangin thil tum fel tak neiin kan khel. Serie A lamah pawh tum fel tak kan nei a, chumi tihlawhtling tur chuan thapui kan thawh zel ang," a ti.