Match nga inkhel thei lo tur Kudus

West Ham winger Mohammed Kudus chuan Tottenham Hotspur nen an inkhelh ṭumin, buainaah kut a thawh ngei tih a inpawm a, hei vang hian match hnih dang khel thei lo tura hrem a ni - a hmaa hremna nen chuan match nga a inkhel thei dawn lo tihna a ni.

October 19 zan khan West Ham hian Tottenham Hotspur chu khualmualah 4-1 in an ngam lo a, minute 82-naah Kudus hian buaina ti chhuakin red card pek a ni. Tharum thawhna avanga red card hmu a nih avangin match thum atan hrem a ni a, a tihsual a pawm hnuah match hnih dang an hrem belhchhah.

Kudus hi a tirah tak chuan Spurs defender Micky van de Ven laka a foul avangin yellow card pek a ni a, mahse, Dutch defender hi nam zuiin, Spurs player dang Pape Matar Sarr chu a hmaiah a nam bawk.

Kum 24 mi Ghana international hi £60,000 (Rs. 65,32,044) chawitir a ni bawk a, West Ham chu an player-te an thunun loh avangin £30,000 (Rs. 32,66,022) chawitir an ni bawk - Kudus hi December 3 zana Leicester City an lenchilh hunah a inlan thei chauh ang.

Kudus hian hremna avangin 2-1 a Manchester United an hnehna inkhel leh Nottingham Forest laka 3-0 a an tlawmna inkhelah Hammers tan khelmual a lut thei lo tawh a, a hremna belhchhah a nih takah chuan Everton (home), Newcastle United (away) leh Arsenal (home) a hmachhawn thei dawn lo bawk.