Atletico lakah PSG chak lo
Paris Saint Germain manager Luis Enrique chuan Atletico Madrid laka an chak loh chhan chu vanduai vang niin a sawi a, chutihrualin Champions League an khelh mekah chuan an dinhmun a ṭha tawk lo tih a sawi bawk.
Nilaini zan khan PSG hian Parc des Princes-ah Spanish team an lo mikhual a, minute 14-naah Warren Zaire-Emery hmangin goal nei mah se an hum rei lo, mikhual tan Nahuel Malina chuan sutin, hun tawp dawnah Angel Correa chuan 2-1 a chakna goal a khung.
Paris club tan hian Achraf Hakimi, Bradley Barcola leh Ousmane Dembele te chuan goal khung theihna remchang an hmu a, mahse an hlah vek - an vanneih zan a ni mawlh lo.
Enrique chuan, "Kan khelmuala match pathum kan khelh hoah inkhel thununtu kan ni vek a, hnehna chan phu tak pawhin kan khel vek, mahse kan duh ang result erawh kan nei thei tlat lo lai hi a pawi hle.
"Tunah hian kan beidawng tur erawh a ni lo, kan tan kawng tlemte tal a la inhawng ve a nih chuan theihtawp chhuahin kan bei chhunzawm tur a ni ang, kawng lakah kan chawl thiang lo," tiin a sawi.
Spanish manager chuan sawi zawmin, "Football hi kum 30 chhung chu a tak ramah ka lo chenchilh tawh a, tun ṭum kan match zet kha chu sawifiah thiam pawh a harsa ka ti hle, kan match hnuhnung pathumah goal khung theihna vawi 50 vel kan siam chhuak.
"Mahse, goal khung tak erawh kan harsat tlat si. Goal khat khung tura hun remchang vawi 20 vel insiam a ngaih chuan hna a hautak a, a hmawr bawk dan kan thiam a pawimawh takzet a ni," tiin a sawi.
Ligue 1 champion hian Champions League lamah beisei an phak lo hle - team 36 inel zingah 25-na an ni mek a, tuna an awmna aṭang chuan last 16 an lut phak lo a, playoff pawh an khel phak dawn lo.
November 26 hian Bayern Munich hmachhawn turin Allianz Arena an tlawh zui dawn, an tan German team lian leh ṭha laka point thum va hlawhchhuah chu thil awlsam a ni kher lo ang.
Atletico Madrid manager Diego Simeone erawhin a naute khelh dana a lungawi thu sawiin, "Kan defender ṭha zinga panga an inkhel thei lo a, chutiang taka harsatna kan tawk chung chuan Paris khawpuiah kan dingkhawng thei, kan khel ṭha vek tihna a ni," a ti.