Premier League Thlirletna Arsenal vawi hnih hneh theitu Swansea

Thawhṭanni zanlai inkhelah Arsenal-in Manchester City umphak theihna hun ṭha an neih an bawh pelh a, Bafetimbi Gomis-a goal khat tauh luh hmangin an mikhual Swansea chu 1-0 in an hneh lo. Season ṭan tirh khan Liberty Stadium-ah Arsenal hi an lo tlawm tawh bawk.

Kum 1994 hnua a vawikhat nan Arsene Wenger-a'n first eleven a zawna a vawinga nan a hmang nawn leh a, inkhel thunun tak chung siin first half-ah goal zawnah vawikhatmah an pet lo.

Tun season-ah Swansea hian an khelmualah leh khual mualah Arsenal hi an hneh ve ve a, hei mai hi ala ni lo, Manchester United pawh vawihnih an hneh thei a ni. West Ham leh Chelsea tih lohah chuan season khat chhung a Arsenal leh Manchester United hneh vek thei an ni.

Inkhel chu

Tlar hmaah Olivier Giroud a awm a, a hnung chiahah Mesut Ozil leh Alexis Sanchez te an awm avangin Swansea tlarhnung an su hawng ngei tur a ngaih a ni. Mahse, Ball chang tam Arsenal Swansea goal hmaah an hlauhawm lo a, midfielder Jonjo Shelvey chuan first half-ah vawi thum ngawt Gunners goalkeeper David Ospina a rum ṭhaih thung.

Second half-ah erawh thil a danglam hret, goal khung ngei tumin Arsenal hmatawng ten Swansea goal-ah an pet mawlh mawlh. Sanchez a goal shot goal ngei tura lang chu goal ban sirah a kal liam hnu lawk a Giroud-a goal shot ṭha tak mai chu Swansea goalkeeper Lukasz Fabianski-an ropui takin a lo dan sak.

Arsenal player inhlaim dam hlim Theo Walcott leh Jack Wilshere luh hnuin Gunners an hlauhawm lehzual a, Nacho Monreal, Aaron Ramsey, Santiago Cazorla leh Walcott te chuan goal khungna hun ṭha nei vek mah se an goalkeeper hlui Fabianski an sutlang zo lo vek, An goal shot ṭa tak tak te hi Fabianski ṭhat zia ti lang tu maiah an chang zo ta a ni.

Goal lut loin inkhel a tawp mai dawnin a lang hman a, mahse minute 85 na a Jefferson Montero cross ball ṭha tak mai chu Bafetimbi Gomis chuan a lo tauh goal hlauh. Arsenal defender Laurent Kocielney-an a hna a tlin loh bakah Per Mertesacker a awm loh na hmun tura a awm vang a ni bawk.

Gomis a ball tauh hi Gunners goalkeeper Ospina chuan a dang hmanin lang mah se goal line technology hmangin chiang takin a goal tih a hmuh theih. Goal dang luhna hun a awm tawh lo a, tun season a vawihnih nan Swansea-in Arsenal an hneh.

Tun dinhmunah Arsenal hian tun season Premier League match 35 an khelh tawh aṭangin point 70 hmuin table-ah pathumna an ni mek a, pahnihna Man City chu point thumin an pha lo mek. Arsenal ngam loh Swansea hi relegation zone aṭangin an him chiang tawh a, point 56 hmuin table-ah pariatna an ni mek thung.

Eng nge an sawi?

Swansea manager Garry Monk chuan, "Kar tluan a kan inzirna leh thawhrimna rah chu a alo langchhuak thei ta, player tin ten an tih tur ṭheuh ṭha takin an zir vek a chu chu an hmang chhuak thei bawk. Striker fit ṭha khelh tir tur kan neih loh avangin midfield-ah kan inhnawh angai a, kan ti sual lem lo e. A tawp lam minute 20 chhung khan chak tumin kan bei ve chauh a, a hautak tak zet. Kan vannei a, point thum kan hmu hram a ni," tiin an vanneih thu a sawi.

Arsenal manager Arsene Wenger chuan, "A pawimawh ber goal kan khung thei tlat lo kha a vanduai thlak hlein ka hria. Khatiang a inkhel kan thunun thei anih chuan game 20 aṭangin vawi 19 chu kan chak hial ang. Mahse, zanin kha kan vanduai zan a ni. Swansea khan an tlarhnung an remphui ṭhat em avang khan point hmuh an phu e," tiin vanduai a intih thu a sawi.