Khiangte Construction Ṭhazual Lengzem : Siampuii Ralte 'Lengi' khumtu an awm lo

Siampuii Ralte music video thar, 'Lengi' chu Khiangte Construction Ṭhazual Lengzem chart tharah khumtu an awm lo.

'Lengi' hi tih chhuah a nih aṭangin chart-ah a rawn lang nghal a, hma rawn sawn zelin pakhatna a ni ta a ni. Siampuii hian he hla hi September 6-ah a YouTube channel-ah a rawn dah chhuak a, a hla phuahtu hi Philip Lalremruata, The Radio band vocalist+guitarist a ni. Music video hi Reuben Lalmalsawma kut chhuak niin, music hi Smiley siam a ni ve thung. A hla hi a ngaihnawmin a satuin a thiam a, Siampuii chevel chu a hmuhnawm bawk nen, a music video pawh thlir a manhla leh hle.

Zothana leh Zodini-te sak, 'Kumtluang' chu pahnihnaah a rawn lang. He hla hi Mizo film, Lerlawri OST a ni a, a phuahtu hi Vanzara a ni. Music leh recording hi Tluanga Hnamte (Westend Studio) ah tiin, video hi Mike, Zote Entertainment siam a ni thung. Tun hnaia rawn comeback leh ta, Zaii Hauchhum chuan 'Thawnthu hlui' chu pathumnaah a rawn lanpui bawk. He hla pawh hi Sernung film OST niin, he film-ah hian Zaii hi a chang bawk a ni.

Band ṭhangduang tak mai, The Radio leh Saiwannah te thawhdunna, 'Lam dun ila' chu Ṭhazual Lengzem chart tharah No 4-ah awmin, hma an sawn zel pawh a rinawm. Mendal chuan 'I hai der em ni' tiin Top 5 a rawn khar.

Chart tharah hian Mizo girl band lar em em ṭhin, Blue Corn-in kum 10 chuang hnua music video an rawn tih chhuah thar, 'Luah loh zun' tih chu No 6-ah a rawn lang bawk. Top 10-ah hian Latei Hringen, Smiley X Hex Da Marshall, Rosalind Khawlhring leh Saka te an lang bawk a ni.