US President thar thlangin vote thlak dawn

US President thlangin November 5, 2025 hian vote thlak a ni dawn ta. Hetih lai hian Election Day hmaa vote lo thlak hmasa, early voting ah mi mtd 77 chuangin vote an thlak tawh a ni.

President 47-na tur thlannaah hian Democratic party candidate, vice president ni lai Kamala Harris leh Republican party candidate, president hlui Donald Trump te inbitumin, kumin inthlan hi candidate-te intum tawk berna zingah chhiar a ni.

Inthlan hmaa mipui ngaihdan lakah candidate pahnihte hi an inbei tawk chho hle a, hei vang hian ṭan bik nei lo tamna, swing state-a an dinhmunin inthlan result hi a hril dawn hle nia ngaih a ni a, heng state-ah hian ṭan pawh an la nasa dun hle. Vote thlak hma ho ngaihdan lak hnuhnung berah chuan Kamala Harris hian hma a hruai a, hetih lai hian vote la thlak ve lo, election day-a vote thlak tum zingah Trump-a'n hma a hruai ve thung.

Vote tla te hi an ram huna November 5 zanah chhiar nghal a ni ang. An time zone a in an loh avangin US khawthlang lam state ṭhenkhata vote an la thlak laiin, khawchhak lam state ṭhenkhatah chuan vote an chhiar ṭan hman tawh ang.