New Zealand-in mual neitu India an sawp

India leh New Zealand-in November 3, Pathianni khan Test series match thumna leh tawpna chu ni thumna lekah an khel zo a, Mumbai-a inkhelah hian mikhual Black Caps hi 25 runs-a chakin series 3-0 in an la.

Black Caps hian Wankhede Stadium, Mumbai-a match hnuhnung ber a khelh hma hian India hi M. Chinnaswamy Stadium, Bengaluru leh Maharashtra Cricket Association Stadium, Pune-ah te an hneh tawh. Hei vang hian India hi mualpho thei dinhmunah an ding.

Kum 2000 khan South Africa-in India hi Test series-ah 2-0 in an hneh tawh a, hemi hnu hian Men in Blue-in clean sweep an la tawng leh ngai lo. Tun ṭum hi series-a match thum awm china India an muala an chak loh vek vawi khatna a ni.

Black Caps-in vawm hmasak an thlang a, first innings-ah 235 runs an siam. India bat hun at thleng a, 263 runs an siam pha a, duhthusama ṭhain bat lo mah se dinhmun ṭha zawkah an ding.

Second innings-ah pawh first innings-a wicket nga latu Ravindra Jadeja a che ṭha nawn a, wicket nga tho la lehin Ravinchandran Ashwin-a'n (63/3) a thlawp ṭhat bawk avangin mikhual team-in 174 runs chauh an siam.

India tan chak turin 147 runs chauh siam a ngai a, mahni muala khel tur an nih bawk avangin hna harsa tur niin a lang lo. Mahse, top order Yashavi Jaiswal (5), Rohit Sharma (11), Shubman Gill (1) leh Virat Kohli (1) te run siam zat belhkhawm chu 18 runs chauh a ni.

Mualneituin New Zealand spinner Ajaz Patel an ngam lo a, India hi 121 runs an siam tihin an thi fai vek. Patel hian 57 runs chauh pein wicket ruk a la a, first innings-ah 103 runs pein wicket nga a la bawk.

Black Caps batter Daryl Mitchell chuan, "India rama Test match-a hnehna chan hrim hrim hi a lawmawm a, series 3-0 a lak phei chu mumang ang hial a ni," tiin hnehna an chan avanga an lawm thu a sawi.