Paris Masters champion Alexander Zverev

Alexander Zverev chuan tualchhung tlangval Ugo Humbert-a chu straight set hmanga hnehin, a vawi khat nan Paris Masters title a la.

World number 2 ni thar Zverev hian French number 1 hi 6-2, 6-2 in a hneh a, hnehna chang tur hian darkar khat leh minute 16 chhung hun a hmang a, tennis a khelh hun chhungin ATP 1000 title pasarih a la tling ta chiah a ni.

Player pahnih te hian tun season chhunga final an khelh vawi lina an tawng ve ve a, inkhel hmuhnawmah Zverev a dingchang - German tlangval hian June thla khan French Open final pawh a khel a, mahse Carlos Alcaraz a ngam lo.

Zverev hian Inrinnia semifinal a paltlang khan final a lut a ni satliah lo a, world ranking lamah Alcaraz lehpelin number 2 dinhmun a luah tih a chiang nghal bawk.

German tlangval Zverev chuan, "Kum hnih liam ta khan Paris khawpuiah hian harsatna nasa tak ka lo tawk tawh a, ka kerek hliam vangin mittui nen French Open ka lo mangṭha tawh a ni, tunah erawh Paris khawpuiah ngei nomawi la chawi leh ta.

"Champion tur chuan ṭha taka khelh a ngai a, duhthusam ang thlap chuan khel chhuak vek lo mah ila title la khawpa ka khel chu a lawmawm, tuna ka khelh ṭhatna hi ATP Finals lamah pawh chhawm nun theih ngei ka inbeisei bawk a ni,” tiin a sawi.

Kum 26 mi, tun dinhmuna world number 18 Humbert chuan, "He hmunah hian ka naupan lai chuan inkhel ka en ṭhin a, match khel ve phak nih kha ka chak ṭhin. Tunah chuan ka inkhel a ni satliah lo a, final hial ka khel ve mai hi ka tan chuan thil lawmawm leh chhinchhiah tlak a ni," a ti.

Zverev hi player ṭha leh theihna nei sang bik zinga mi a ni a, mahse Grand Slam nomawi erawh a la chawi lo. Chutihrualin, ATP Tour title 23 ngawt a la tling tawh a, kum 27 mi niin nomawi dang pawh a la chawi belh nual ngeiin a rinawm.

Tennis season a zo hnai a, inelna ngaihhut zinga mi ATP Fianls khelh hmabak an la nei. Italy rama khawpui pakhat Turin-ah a thiam zual pariat ten inelna an la hmachhawn leh dawn a, a thiam zinga thiam ber nih an la inchuh leh dawn a ni.