Goal nen Dani Olmo a lo kir leh ta

Hliam vanga thla khat zen zawn a chawlh hnuah, a vawi khat nan Dani Olmo-a'n Barcelona jersey nen inkhel bul a ṭan a, goal hnih a khung nghal - Catalan derby-ah Barca a chakpui a, Espanyol chu 3-1 in an hneh.

Barcelona tan Olmo bakah player 'form' em em mai Raphinha chuan goal khat a khung ve bawk a, Espanyol-in Javier Puado hmangin khung ve bawk mah se, scoreline cheimawina bak a tling zo lo.

Catalan club-in hnehna an chan avangin La Liga table chung berah an dinhmun an sawhnghet zual sauh a, pahnihna Real Madrid aiin point kuain an sang tawh zawk - Real hian Valencia lama tuilian avangin kar tawp match an nei ve lo thung.

Hetihlai hian Atletico Madrid chuan 2-0 in an mikhual Las Palmas an hneh ve bawk a, Giuliano Simeone leh Alexander Sorloth ten goal khat ve ve an khung a, mikhual team-in a chhanletna tur an nei lo.

Kha le Barca

Barcelona-in Espanyol laka hnehna chang turin harsatna an tawk lo a, first half chhungin goal thum hi an khung fel der tawh - minute 12-na lekah Olmo chuan goal hmahruai a khung a, he goal luh theih nana Lamine Yamal-a 'assist' chu player class bik ke aṭanga chhuak a ni.

Minute 11 a liam a, Barca player naupang dang kan hmu - kum 21 mi Marc Casado chuan Raphinha tan ṭha zetin a siamsak ve leh a, Brazilian forward hian tun season-a a goal 11-na ni turin goal-ah a lo chantir.

Raphinha hian tun season-ah Barca tan inelna hrang hrangah match 15 khelin goal 11 a khung a, assist vawi kua a nei bawk. Espanyol hian Jofre Carreras hmangin si phurh an sut ṭhenah an inngai hman a, mahse, video assistant referee (VAR) rawn a nih hnuah goal-ah pawmsak an ni lo.

Barca-in Espanyol an hrem zui. Olmo bawk inlar lehin, minute 31-naah an goal thumna chiang zetin a khung - Barca-in goal dang khung tawh lo mah se mikhual team tan captain Javier Puado-a'n goal khat chiaha chhangletin, a tawpah 3-1 in Barca an chak.

Chakna Olmo

Barcelona-in nipui transfer-ah, an academy chhuak, RB Leipzig player Olmo chu an la te a, euro maktaduai 60 bawr vel an inseng - Olmo hian season bul ṭan ṭha viau mah se, hliam vangin a buai zui.

Mahse, El Clasico-a bench aṭanga luhtir Olmo-a'n a dam tawh tih pholangin, Espanyol lakah inkhel bul a ṭan a, goal hnih a khung nghal - amah ringtu coach Hansi Flick a tithlawn lo chiang hle.

Olmo hian Barcelona a zawm hnuah inelna hrang hrangah match ruk khelin, goal nga a khung tling der tawh a, mahse, hetah hian duhtak mai a la tum lo. Kum 26 mi attacking midfielder chuan, "Nuam ka ti hle. Ka lo kir hun tur hi nghakhlel takin ka thlir a, khelmuala ka team puih theih kha ka châk hle.

"Tunah chuan ka lo kir ta a, nuam ka ti a, hnehna kan chang bawk. Hlawhtlinna chan zel duhin ka tuihal a ni," a ti a, Barcelona ṭantute tan thu hriat nuam tak a ni ang.

Atletico tan pafa!

An league match hnuhnung bera Real Betis an ngam loh hnuin Atletico Madrid an insiamṭha a, an mikhual Las Palmas chu 2-0 in an hneh - he inkhela thil thleng danglam tak chu Giuliano Simeone-a goal a khung a ni.

Kum 21 mi forward hian minute 37-naah Atletico tan goal hmahruai a khung a, Atletico tana a goal hmasa ber a ni - club academy chhuak forward hi a pa chu tuna an coach Diego Simeone hi a ni!

Giuliano chuan, "Atletico tana ka goal hmasa ber ka khung thei hi ka lawm hle a, chutihrual chuan Valencia tuilian vanga harsatna tawkte ka hre reng," a ti a, a goal khung chu an tan a hlan.

Atletico boss Simeone chuan, "A thawkrim a, training a nei ṭha a, a kal zelna turah a goal khung hi a pawimawh hle," a ti a, a fapa a fak - Sorloth chuan minute 83-naah chak nemnghehna goal a khung zui a, Atletico an chak ve leh ta.