Ropui takin Verstappen a chak

Max Verstappen chuan driver ṭha bik a nihna a takin a lantir leh ta - a hmaah driver 16 ngawtin intlansiak bul an ṭan a, inelna a zawh meuh chuan Red Bull driver hi a hmasa berah a thleng.

Pathianni zana tlan zawh tak Sao Paulo Grand Prix-ah Verstappen a che pui hle a, lap hmasa berah mi paruk a tlan pel hman a, lap hnihna an tlan meuh chuan 10-naah a awm der tawh!

Tun hnaiah intlansiak 10 ngawt chu chak ni hmel hmu lo a awm a ni bawk a, hnehna chan chakin a tuihal huam huam a ni ber mai. Lap 69 an tlan zawh meuh chuan mah hneih bertu Esteban Ocon aiin second 19.477 ngawtin a thleng hmasa zawk.

Car intlansiakna sang ber hi tun season chhungin inelna hmabak pathum an la nei, hengah te hian point hmuh belh theih 86 a la awm. Tun dinhmunah Max-a hian Lando Norris lakah point 62 ngawtin hma a hruai fal leh ta a, a zawna a vawi li nan a champion ngei dawn ni pawhin a lang leh ta.

Kum 27 mi Max Verstappen chuan, "Car intlansiakna tam tak ka lo hmachhawn ve tawh a, inelna hautak leh harsa tak tak pawh ka tawng tawh. Chung zingah chuan tun ṭuma mi hi a harsa pawl a ni a, hnehna ka chan tawhna hoah chuan a ropui leh ṭha berte zinga mi a ni bawk," a ti.

Formula 1 hi November 24, Pathianni chawhma dar 11:30 hian Las Vegas Grand Prix an tlan leh ang. Las Vegas Street Circuit tlan kawnga inelna hi khawvel huap milarten an en nasa leh hle tura ngaih a ni.