Rodrygo-a'n training a zawm

Real Madrid chuan Champions League khel turin zanin dar 1:30 hian AC Milan an mikhual dawn a, an forward Rodrygo chuan training pangngai a zawm tawh avangin Italian club hi a hmachhawn thei tura ngaih a ni.

Tuilian vangin Spain ram hmun ṭhenkhat a buai a, hei vang hian Real Madrid pawhin kar tawpah La Liga match an khel thei lo, league match khel hah loin UCL atan an inbuatsaih theih phah ta zawk.

Brazil international Rodrygo hi Borussia Dortmund nen UCL match an khelh ṭuma inhliam kha a ni a, tunah chuan manager Carlo Ancelotti tan chhawr theih a ni leh ta, tlarhma lamah duhthlan tur a ngah leh sawt dawn tihna a ni.

Rodrigo hi Kylian Mbappe leh Luka Modric te nen an training lai thlalak dah chhuah a ni a, inkhel turin a inpeih tih a lang. Vinicius Junior a dam ṭha bawk a, Milan tan lenchilh an châkawm hran lo ang.

Goalkeeper ṭha Thibaut Courtois bakah David Alaba leh Dani Carvajal te erawh hliam vangin an la inkhel ve thei dawn lo a, an ṭhat dan ber erawh chuan an la khel thei dawn bik rih lo tihna a ni.

Real Madrid mikhual tur Milan hi season bul ṭan fuh tawk lo an ni a, chutihrualin kar tawp Serie A inkhelah Monza chu 1-0 in an hneh. Paulo Fonseca enkawl Milan tan Spanish club lian lenchilh hi fiahna lian leh hautak a ni ang.