Spurs-in Aston Villa an sawp

Tottenham Hotspur-in season duhawm tak hmangtu Aston Villa lakah goal chhuah hmasa zuk mah se, goal liin an chhanglet a, an mikhual hi 4-1 ngawtin an lo sawp - ngaihthah thiang an ni lo tih an pholang.

Spurs khelmualah mualneitu fan-te an ngawi hmasa a, minute 32-naah Morgan Rogers chuan inkhela target-a 'shot' hmasa ber hmangin goal hmahruai a khung der - tun season-a tluk leh din fawm reng Spurs ṭantute an hlauthawng.

Villa hian inkhel ṭantir lamah Amadou Onana hmangin post an tihper bawk a, first half chu mikhual team hian London club goal nawr na tak tur chu an dang chat thei.

Mahse, second half a ni a, thawnthu chu thlak danglamin a awm zui. Minute 49-naah Son Heung-min-a cross duhthusam chu Brennan Johnson chuan goal-ah a chantir a, si phurh a sut.

Spurs an phur sawt. Pound maktaduai 65 man Dominic Solanke-a'n ngaihthah chi a ni lo tih pholangin, goal hnih a rawn khung a, London club-in man to taka an lei ngam chhan a pholang - tun season inelna hrang hrangah Spurs tan match 13 khela goal nga khungin, assist vawi hnih a nei tawh.

A la tawk zo lo cheu - hun pek belhah James Maddison chuan freekick ṭha zet hmangin an goal lina a khung zui a, season duhawm tak hmangtu Villa hi Spurs hmaah dawl zawrin an zawr a ni ber.

Spurs boss Ange Postecoglou chuan, "Ka player-te hian inrintawkna sang tak an nei a, kan thil tumah kan chiang a, chutianga kan tih zel chuan dan pawh kan harsa a ni," a ti a, a team-ah beiseina a neih thu a sawi.

Tottenham tan tun season-a league match nga an khelha an vawi nga chakna chiah a ni - vawi li an tlawm tawh a, vawi khat an khingpui an inhnehtawkpui bawk.