Liverpool-in Alonso 'Leverkusen' an mikhual dawn

Premier League hmahruaitu Liverpool chuan club legend Xabi Alonso chu zanin dar 1:30 hian Anfield-ah an lo mikhual dawn a, mahse, tun ṭum an mikhual dan tur erawh a danglam dawn.

Champions League 2005-a ropui taka an champion ṭuma final-a goal khungtu Alonso hi coach a ni tawh a, Bayer Leverkusen enkawltu a ni. Zaninah hian Anfield-ah a club hlui tana mangchhia thlen turin a leng dawn.

Liverpool-in Leverkusen an mikhual dawn a, an player hlui team enkawl laka tlawm an duh dawn lo. Tun season Champions League-a match thum an khelh tawhah team pahnih hi an la tlawm miah lo a, a vawi khat nan tlawm zawk an awm lo ang tih a sawi theih loh.

Reds hian match thum an khelh tawhah hnehna chang vekin, a tikimtu mai an ni lo tih an pholang a, Leverkusen hian point sarih an nei mek thung - tu zawk nge chungnung dawn? kan hre thuai dawn e.

Slot-a Liverpool

Jurgen Klopp-a'n team ṭha tak din chungin, player ṭha tak tak hnutchhiah chungin Reds a kalsan a, player leh khelh danah Klopp-a hlimthla hmuh chang a awm lo thei lo. Mahse, season a rei deuh deuh a, Slot-a sulhnu hmuh tur a awm tial tial.

Klopp-a 'heavy metal football' chu thlah a ni a, Slot-a hnuaiah Liverpool-in fimkhur zawkin an khel. Ball an inpe tam a, rang tak taka innawr a tam lo a, fimkhur takin, tha khek thiam tak siin, ball chang tam chunga khingpui team tlarhnung ṭhiah chu an thupui a ni.

Gegenpressing football ngainatute tan chuan Slot-a game hi a hmuhnawm tawk lo, a tih theih a, a fimkhur lutuk hreta ngaih chang a awm thei bawk. Mahse, hei hian result a hlawhchhuahpui miau a, sawisel theih a ni lo.

A tawi zawnga sawi chuan, Liverpool hian goal thum an khung hnu pawha khung belh tuma an nawr reng boruak ang kha an kalsan a, si khat hum tur ringawta khelh chang an nei ta zawk - mahse, hemi hmang hian Premier League table chung ber an luah miau si!

Tichuan...

Slot-a'n Liverpool squad a siksawi ve reng a, hei hi fixture hautak karah chuan a ṭha zawk tih ngam a ni. Zaninah pawh Brighton & Hove Albion laka team nen a rawn thlak danglam hret a nih pawhin a mak lo ang.

Liverpool tan goalkeeper Alisson chu inlan lo tur chiang a ni a, mahse, a awm loh hlana Caoimhin Kelleher a chet ṭhat avangin Reds tan thlaphan viauna tur a awm lo. Hetihrual hian Brighton lakah Ibrahima Konate a inhliam a, a aia lut turin Joe Gomez a awm - Virgil van Dijk nen an inkawp ang.

Slot-a'n left back-ah Andy Robertson leh Konstantinos Tsimikas a chhawr chhawk ṭhin a, zaninah Robertson chu bul ṭan tura beisei a ni - Ryan Gravenberch pawh bul ṭan chiang tur a ni a, Alexis Mac Allister leh Curtis Jones ten an thlawp a rinawm.

Kum 32-ah pawh Mohamed Salah hi bench-a dah ngam a la ni lo a, Darwin Nunez leh Luis Diaz te an luh a rinawm bawk - Diogo Jota a inhliam a, bench aṭanga danglamna thlen tura lut turin Cody Gakpo a la awm cheu ang.

A harsa dawn

Alonso-a'n Anfield-a Liverpool jersey ha chunga inlan awmzia a hria a, mikhual anga lenluh awmzia pawh a hria - zaninah coach angin a leng dawn a, nipui laia a hnar tak nia sawi club hian an legend lakah zahngaihna an lantir dawn lo.

Spanish coach chuan, "Anfield-a Champions League match khelh aia ropui zawk hi a awm lo hial mai thei a, a boruak ringawt pawh a ropui ṭhin hle. Europe-a team ṭha ber pawl an ni a, kan tan chuan chona hautak zet a ni.

"Awlsam taka min kaltir an tum lo ang," tiin a sawi a, Anfield-a Liverpool hneh a awlsam dawn lo tih a hria - Reds hian tun season Champions League-ah AC Milan (3-1), Bologna (2-0) leh RB Leipzig (1-0) an hneh tawh.

Hei chauh a ni lo - League Cup match hnih an chak tawh a, Premier League match 10 an khelh tawhah vawi riat chakin, vawi khat draw an nei a, vawi khat chiah an la tlawm bawk - mahni mualah German club hi an hlau lo ang.

Leverkusen chu

Season hmasa khan tlawm nei loin Bundesliga nomawi an chawi a, DFB-Pokal an champion a, Europa League final an lut bawk - mahse, an coach leh player ṭha tam zawk an chelh chungin Leverkusen-in tun season-ah beisei an phak lo.

League match kuaah vawi li an chak a, vawi li draw neiin vawi khat an tlawm - DFB Pokal-a match hnih an khelh tawhah an chak ve ve thung a, Champions League-ah pawh an la tlawm lo. Mahse, Alonso naute hian match hmasa berah Feyenoord chu 4-0 in sawp mah se, an match hnuhnung berah French club lian lo Brest chu 1-1 in an inhnehtawkpui hram.

Brest khelmuala chak lo team tan Liverpool khelmuala chak a harsa dawn tih a chiang a, Brest hnuah hian league match hnih khelin an chak zo lo ve ve bawk - an khingpui an draw.

A tawi zawnga sawi chuan Leverkusen tan tun hi an ṭhat lai ber a ni lo a, Liverpool goal nawr na tak chhu chat turin Xhaka khelh ṭhat a ṭul a, tlarhmaah Victor Boniface leh Florian Wirtz ten an hna an hlen a ngai bawk.