ISL match 150 kheltu Lianzuala

Lallianzuala Chhangte a reh rei thei tak tak lo - Mizo forward hian Pathianni zan khan Indian Super League-a a match 150-na a khel a, goal leh assist hmangin Indian top flight league-a a sulhnu hi a lawm.

Lunglei tlangval captain-na hnuaiah Mumbai City-in Kerala Blasters an mikhual a, 4-2 in an hneh - Mumbai club hian Nikolaos Karelis goal hnih khung hmangin hma an hruai a, Greece international hlui goal khung hmasak hi Lza siamsak niin, a hnuhnung zawk hi penalty aṭanga lut a ni.

Blasters hian Jesus Jimenez leh Kwame Peprah hmangin si phurh an sut a, Peprah hi a goal khung a lawm uar hret avanga yellow card pahnihna hmuin, hnawhchhuah zui a ni - Blasters an tlem sawt.

Mumbai-in Nathan Rodrigues hmangin hma an hruai nawn a, minute 90-naah Lza'n penalty hmangin chak nemnghehna goal a khung bawk - Mizo tlangval hi player of the match-ah an thlang zui.

Lianzuala chuan, "Match 150 ka lo khel ve ta der mai a, Pathian khawngaihna a ni. Heti zat match khelh zana goal khung chu a dan a dang a, a pawimawh ber erawh point thum kan hlawh chhuak hi a ni.

"Pathian zarah goal ka khung chhunzawm zel ka beisei a, he ka goal khung hian inrintawkna min pek belh dawn. A pawimawh ber erawh engkim hi Pathian kuta hlan a ni a, a hun takah a rawn che zel mai ang - kei chuan khelmual chhung leh pawnah theihtawp ka chhuah reng e," tiin Vanglaini a hrilh.

Kum 27 mi Lza hian ISL-ah Mumbai bakah hian NorthEast United, Delhi Dynamos leh Chennaiyin tan a lo khel tawh a, match 150-ah hian goal 41 khungin assist vawi 20 a nei. Sunil Chhetri tih loha Indian player zinga ISL Golden Ball dawng thei awmchhun a ni bawk.

Mumbai hnehna chan zanah Lza bakah Hmingthanmawia Ralte chuan Mumbai tan inkhel bul a ṭan bawk a, Blasters tan Freddy Lallawmawma chu bench aṭangin a lut thung.

Pathianni zan inkhel dangah NorthEast United chuan 3-2 in Odisha an hneh bawk - Odisha tan Jerry Lalrinzuala, K. Lalṭhathanga leh Isak Vanlalruatfela ten bul an ṭan a, bench aṭangin Jerry Mawihmingthanga a lut bawk.