MPL Playoff a nung ṭha

MPL12 Playoff first leg-ah Kanan FC chuan nimin khan MPL11-a pasarihna Chawnpui FC chu 3-2 in an hneh. November 6, Nilaini hian second leg khelh a ni dawn a, ADFA First Division champion Kanan tan MPL khelh beiseina a la nung zel.

RG Stadium-a inkhelah Chawnpui tan Jerry Lalchhanchhuaha'n minute kuana lekah goal hmahruai a khung. Mahse, Santosh Trophy squad-a tel pha, defender pawimawh Lalramnunmawia chu minute 28-naah goal-a lut tur a ben chhuah avangin hnawhchhuah a ni. Kanan striker Lalthuthlunga'n penalty hi goal-ah a chantir thei lo.

Kananin an hun ṭha bawhpelh an tum lo a, second half-ah na takin an nawr let. Chawnpui defender Laltluangliana'n minute 50-naah an lamah a ti lut a, minute li hnuah First Division top scorer Thlunga'n a tihsual siam ṭhat nan box pawn aṭangin ṭha zetin goal hnihna a khung leh bawk.

Chawngthansanga hote an phur zel a, minute 56-naah captain Lalremruata'n tawih zetin goalkeeper V. Lalthlamuanpuia a pet khum a, Kananin 3-1 in hma an hruai. Goal thum luh hnuah pawh Kananin an nawr chhunzawm a, mah se Chawnpui keeper Apuia a chet ṭhat avangin goal dang an khung thei tawh lo.

Mahse, hun tawp hma hretin Kanain penalty an chawi a, Chawnpui tan Lalthanzuala'n siphurh a sut ṭhen. First leg-ah Kanan 3-2 in an chak a, Chawngthansanga hote dinhmun ṭha hret mah se Lalrindika Hmar enkawl Chawnpui hi second leg-ah chuan player kimin an khel thei tawh dawn. MPL12 khel tur hriatthiam a la har hle.