Guardiola-a'n Sporting a luhchilh dawn

Manchester City leh Sporting Lisbon ten Champions League an khelh tur hi ni dang chu ni se ngaihven hlawh tak a ni hren lo ang, mahse Sporting manager Ruben Amorim hi Manchester United manager tura ruat a ni tawh a, zanin dar 1:30-a an intawng tur hian ngaihven a hlawh lo thei lo a ni.

Team pahnih boruak a inang lo - Premier League champion lai Man City hi kartawp inkhelah khan Bournemouth lakah 2-1 in an tlawm, Portuguese league lamah erawh Sporting hian Estrela Amadora chu 5-1 in an lo sawp ve thung.

Man City leh Sporting hian inanna tak pakhat an nei, an inanna chu striker ṭha bik neitu an ni. City hmatawng Erling Haaland hi a hmang a langsar a, EPL mai bakah UCL champion tawh niin a buk a rit hle.

Norway international striker hian season tir lam khan goal a khung thei pawp pawp hle a, tun hnaiah erawh a ke hmui zualpui a reh rih deuh a, midfielder ṭha Rodri leh Kevin de Bruyne te awm loh hlain chet a harsat.

England international Phil Foden a dam ṭha tawh a, ani hi Haaland nen inkawp rem thei tak an ni - zaninah pawh anni pahnih hi Sporting tlarhnung tana ven uluk ngai an ni dawn, dan hneh erawh a awlsam lo mai thei.

Sporting hian Haaland an mamawh bik lo! A chhan chu season hmasa inelna hrang hranga goal 43 khung thei Viktor Gyokeres an nei tlat - Swedish international hian season kal laiah pawh match 15 aṭangin goal 16 a khung leh der tawh.

Amorin-a'n a striker ṭha Gyokeres hi a hmang thiam em em mai a, tlarhnung remphui hleithei lo Man City tan pawh ven huphurhawm tak tur a ni dawn. 6ft 2in a sang a ni a, leiah leh boruakah ven uluk a ngai dawn hle.

Kum 26 mi Gyokeres hi nipui bazar lai khan Arsenal chuan lakluh tumin an lo hel tawh a, mahse North London club a pan ta rih lo. Tunah an manager a chhuak dawn a, nakkum thlasik leh nipui bazar laia club lian ten an inchuh tur a ni dawn chiang.

Man City manager Guardiola leh Amorim te tan EPL lama an inel tur boruak siam ṭanna tur a ni nghal thei dawn a, hei vang hian inkhel hian ngaihven a hlawh ang - Sporting inkhel hi Man United ṭantute chuan an en châk furin a rinawm.