Manager nei lo Man United leh Chelsea 'thar' inhnehtawk

Pathianni zan khan Old Trafford-ah Manchester United-in Chelsea an mikhual a, Premier League inkhel nung ṭha takah chak zawk an awm lo, 1-1 in an inhnehtawk. Manager lailawk Ruud van Nistelrooy hnuaia khel Man United-in captain Bruno Fernandes penalty hmangin goal khung hmasa mah se Blues-in Moises Caicedo goal mawi hmangin siphurh an sut.

Enzo Maresca hoten match 10 aṭangin point 18 an hmu a, an point hmuh zat hmu ve dang Arsenal leh Aston Villa te aia an goal difference a ṭhat zawk avangin palinaah an awm. Manchester United erawh point 12 chauh an la hmuh avangin 13-naah an lungawi a ṭul.

Ṭhat dan ve ve

Man United-in player inhliam an neih miau avangin Ruud van Nistelrooy atan squad siksawi theih a ni lo a, League Cup-a Leicester City an sawp ṭuma bul ṭan lo Andre Onana, Noussair Mazraoui leh Rasmus Hojlund ten bul an ṭan.

Christian Eriksen-a'n 100% fitness a neih hman loh avangin squad-ah a awm lo a, Manuel Ugarte a inlan nawn. Ugarte tih loh zawng chu Ten Hag-a team enkawl hnuhnun ber ṭuma bul ṭantute tho an ni a, player thlan hrim hrimah chuan danglamna a awm lo a tih theih.

Chelsea-in match zawnin Newcastle an hmachhawn a, Premier League-ah 2-1 a hnehin League Cup-ah player an thlak hlawk a, 2-0 in an chak lo. Maresca-a'n a rin zawk chu league-a player chhawrte an ni a, Magpies an hneh ṭuma bul ṭantute bawkin bul an ṭan.

Chungte chu Robert Sanchez; Malo Gusto, Wesley Fofana, Levi Colwill, Reece James; Moises Caicedo, Romeo Lavia; Noni Madueke, Cole Palmer, Pedro Neto leh Nicolas Jackson te an ni.

An ṭang ve ve

Man United leh Chelsea te inkhel a dak ṭha lo a, mah se chak tumin an ṭang ve ve. Ruud-a hoten bul ṭan ṭha hret mah se goal hmaah mikhual team an hlauhawm zawk. Cole Palmer-a'n hun ṭha nei mah se Matthijs de Ligt-a'n a dang ṭha.

Palmer-a corner pet chu Noni Madueke-a'n crossbar a tauh per a, a per let chu Levi Colwill chu goal pawnah chiah a pet. Rashford pawhin Chelsea tlarhnung a chhiat buai a, ṭha taka a lakluh hnuah a cross chu keeper Sanchez-a'n ti perin hemi per hi Bruno Fernandes-a'n a pet over.

Team pahnih an inkhel tawk a, Blues striker Jackson hriam deuh se, mikhual team-in goal an khung hmasa ngei ang. Chutihrualin Rashford pawhin first half injury time-ah Fernandes-a ball vawrhluh chu crossbar pet per nan a hmang.

Goal khat ve ve

Man United chauh ni loin Chelsea pawhin pass sual an ngah a, hei vang hian goal chance a awm leh ṭhin a, tlarhma lama awm player-te an hriam tawh lo. Blues winger Neto-a'n box chhung aṭangin goal pawnah chiah a pet a, goal an khung hmasa thei lo.

United pawhin Bruno Fernandes hmangin Blues an vaw let a, a ball pass ṭha chu Garnacho-a'n pet sualin keeper tana man nuam tawk velin a pet. Mahse, Hojlund-a'n Sanchez lakah penalty a hlawh chhuak a, Fernandes-a'n minute 70-naah goal-ah a chantir.

Nistelrooy-a'n an goal khung hi player ang maiin a lawm a, mahse United-in an goal neih hi an hum rei lo. Minute 74-naah Caicedo-a'n minute 74-naah corner kick aṭanga ball kang chhuak chu mawi zetin a volley lut.

Caicedo goal hi goal ropui a ni a, goal dangin a chhunzawm teuh hle. Minute 76-naah De Ligt a tawlh thluk avangin Jackson-a'n goal khung theihna a nei a, goal-ah pet loin Enzo Fernandes tan a pe let. Argentine midfielder tan goal khung ngeina tur niin lang mah se a pet over.

A tawp lamah erawh Man United-in chance ṭha an ngah zawk a, Garnacho-a'n kawh zetin goal chungah chiah a volley. A tawp thlengin inkhel a nung a, Lisandro Martinez-a'n injury time-ah Cole Palmer a tlawh a, hnawhchhuah theih dan awm bawk mah se VAR-in referee ṭawmpuiin yellow card a tawkah a ngai thung.

Engtin zel?

Man United an khel chhe lo a, mahse an finishing a ṭha lo. Club tana goal khung tam ber Garnacho-a'n goal ruk chauh a la khung a, Argentine forward hian inzir tur a la ngah.

Bench aṭanga lut Joshua Zirkzee pawh tlan chak hret se goal khung thei dinhmunah a ding a, mahse amah aia defender-te an tlak chak miau avangin engmah loah a hun ṭha neih chhhuah bawk.

Casemiro-a'n hun tawp lamah yellow card a hmu a, Brazilian midfielder ball hloh chhan hi Garnacho ball hloh vang a ni. Real Madrid midfielder hlui hian Garnacho hi a vin let a, tawnhriat nei player kham khawp loh lai hi entu tan pawh hmuh hmaih a harsa lo.

Chutihrualin Chelsea pawh palinaah awm pha mah se nomawi chuh pha tur em chuan an ṭhat dan a la rual tawk lo a, player ṭha pangngai zingah Palmer a langsar ber.

Palmer chevel a hmuhnawm a, a ball vawi khat khawih a hlawk ṭhin bik hle. Mahse, Old Tafford-ah erawh Palmer-a'n goal a keng tel bik lo a, Manchester City talbuai season-a nomawi chuh pha ve turin Blues tlarhma dangte an hriam leh hret a ṭul ang.