Premier League Relegation Battle - Newcastle United dinhmun a derthawng sawt
Premier League coach ṭha bera inchhal Newcastle manager John Carver-a'n vawi riat a zawna team-te a chak loh pui hnuah Inrinni zan khan West Brom lakah point khat an hlawhchhuak a, result ṭha a ni lo, table-ah 17-naah an tla thla.
Newcastle talbuai laiin Leicester City harhtharna a nung chho zel a, Riyad Mahrez goal hnih hmangin Southampton 2-0 in an hneh. April 4 hnuah Leicester-in point 18 an hlawhchhuak tawh a, season pumpuia an point hmuh zat chanve aiin point khatin a tlem.
Sunderland-in Danny Graham leh Jermain Defoe te goal hmangin Everton an hneh a, relegation zone an chhuahsan. Match thum khelh hmabak la nei mah se Leicester, Arsenal leh Chelsea te an la hmachhawn dawn avangin ngaih ṭha thei an ni lo, Leicester nena an inkhel tur hian season thara an league awmna tur a hril thei ang.
Aston Villa-in manager Tim Sherwood hnuaiah result ṭha an nei zel a, Spurs boss hlui hian an relegate a rin loh thu a sawi tawh a, a sawi dik hmel fu. Villa Park-ah Tom Cleverley goal hmangin West Ham 1-0 in an hneh.
Premier League aṭanga relegate hmasa ber chu Burnley an ni a, kum khat bak an daih lo. Danny Ings goal hmangin Burnley-in Hull City hneh vangin table mawngphah chhuahsan mah se 17-naa awm Newcastle an umphak theih tawh loh avangin season tharah Premier League an khel tawh lo ang.
Chak lo zawk Hull-in table chung lama awm Tottenham leh Manchester United an la hmachhawn dawn a, an dinhmun hi a derthawng takzet. Hull manager manager Steve Bruce chuan, "Points kan la hmuh theih ang hi chu kan hlawhchhuah vek a ngai. Burnley kan hneh loh ṭum aia chhiain a khelh theih loh. Kan hmabak khirh tak hi kan sut tlang nei a ṭul a ni," tiin a sawi.
Table hnuai bera awm QPR chu Pathianni zan khan Manchester City nen an inkhel a, point thum an hlawhchhuah chuan an la tla bik lo ang. Chutihrualin Newcastle leh Sunderland-in an match hmabaka point khat an hmuh chuan QPR hi an tla dawn tho tho.
Tun china a lan dan chuan Hull City hi an hmabak a khirh avangin tla turah a ngaih theih a, an chung chiaha awm QPR leh West Ham la hmachhawn tur Newcastle an him mai a rinawm thung.
Inkhel Results
Everton 0 - 2 Sunderland
Aston Villa 1 - 0 West Ham
Hull City 0 - 1 Burnley
Leicester 2 - 0 Southampton
Newcastle 1 - 1 West Brom
Stoke City 3 - 0 Tottenham
Crystal Palace 1 - 2 Man Utd