Ṭha ber angin ka inhmu lo - Martinez

Emiliano Martinez chuan kum zawnin goalkeeper ṭha ber chawimawina Yashin Trophy a dawng a, chawimawina dawn zawhah inngaitlawm takin ṭha bera a inhmuh lo thu a sawi.

Aston Villa hian November 3, Pathianni zan dar 7:30 hian Tottenham an tlawh dawn a, Martinez hian hmun pawimawh a chang ang.

Martinez chuan, "Ṭha berah ka inngai lo. Goalkeeper ṭha tak tak, kar tina che ṭha an awm. Kei chuan mimal chawimawina ni loin team hlawhtlinna ka ngai pawimawh a, Argentina leh Aston Villa hi ka dah pawimawh," tiin a sawi.

Villa hi season liam ta a an che ṭhat avangin tun season Champions League-ah an tel a, vawi thum khelhah la chak vekin hmahruaitu an ni. Premier League-ah pawh match kua khel tawhin point 18 an hmu a, a sang pali zingah an awm.

Tottenham hi tun dinhmunah pariatnaah awm chauh mah se League Cup-a Man City hneh zo hlim an ni a, inrintawkna an ngah dawn. Ange Postecoglou hnuaiah Spurs-in game ṭha tak an khel ṭhin a, mah se league match hnuhnung berah Crystal Palace an hneh lo. Spurs tan table-a dinhmun siam ṭha turin Villa an hneh hi a pawimawh hle.