Brighton khelmualah Liverpool an chak hram

League Cup champion lai Liverpool-in League Cup quarterfinal lut turin vanneihna an mamawh a, last 16-ah Premier League club tho Brighton & Hove Albion lenchilhin, 3-2 in hnehna an chang.

Reds tan Cody Gakpo chuan goal hnih khungin, Luis Diaz chuan goal khat a thawh ve bawk a, Brighton tana Simon Adingra leh Tariq Lamptey te goal khungin awmzia a nei phak lo - Lamptey-a'n goal a khung hian minute 90-na a ni tawh a, Reds an hlauthawng hman hle.

A tawpah chuan champion lai leh team ṭha zawk Liverpool an chak a, League Cup nomawi humhim an tumna kawngah kawng dik an zawh zel - quarterfinal-ah Southampton an hmachhawn ang.

Second half 'nung'

Brighton khelmualah inkhel a hmuhnawm tawk lo a, first half-ah goal a lut miah lo - second half-ah erawh goal nga a lut a, first half nen chuan lei leh van ang mai a ni. Inkhel a hmuhnawm a, goal kan hmu mawlh mawlh a ni ber mai!

Second half ṭan aṭanga minute khat leknaah Gakpo kan hmu a, Dutch forward hian ṭha zetin goal hmahruai a khung - a 'class' a pholang. He goal hian inkhelh a tinung sawt a, Brighton lamin chance an nei zui ve lehnghal.

Reds tana a vawi khat nana minute 90 khel, third choice keeper Vítezslav Jaros chuan Brighton tana Adingra-a chance neih ṭha zet chu ṭha lutukin a dansak - Evan Ferguson-a'n uiawm takin a thlawh over zui bawk.

Hei le Liverpool

Reds-in goal an khung hnuah Brighton an nung thar a, mahse, an goal khung theih loh rah an seng a, team 'quality' zawk Liverpool-in an hrem zui. Gakpo-a'n mahni hmasial lo taka Dominik Szoboszlai a siamsak chu Hungarian midfielder hian a khung theih loh hnuah Gakpo bawk kan hmu.

Dutch forward hian Tariq Lamptey tihsual zarzoin an goal hnihna a khung a, 2-0 a ni. Mahse, Brighton an ṭang ve tlat - minute 81-naah Reds tlarhnung chetsual zarah Adingra chuan mualneitu team tan a khung ve leh a, boruak a sang lehzual sawt.

Mahse, Brighton fan-te phur lutuk tur beng daih nan Luis Diaz-a'n minute 85-naah a khung a, minute 90-naa Lamptey-a'n a khung ve leh chuan Liverpool laka comeback turin an tan a tlai hret tawh.

Gakpo & League Cup

Liverpool forward Gakpo-a'n League Cup hi a ngaina bik em ni chu aw tih mai tur a ni - season hmasa an champion nan player thawhhlawk a ni a, match li zet he inelnaa a zawna goal khung pawh a nei hial.

Brighton lakah goal hnih a khung a, tun season inelna hrang hrangah match 14 khela goal li khungin, assist vawi hnih a nei tawh a, a goal khung pali hi League Cup veka a khung a ni!

Hetihrual hian match 14 zinga match riatah hian bench aṭanga luhtir a ni a, match thumah lakchhuah a ni bawk - minute 90 khelh tluan a nei mang bar lo tihna a ni a, Ducth forward tan Brighton laka a goal hnih hi coach Arne Slot hnena bul ṭan tlak a nihzia pholanna a ni nghal.