Chelsea-in League Cup an thlah

Enzo Maresca hnuaia indinthar mek Chelsea tan nomawi beseina pakhat chu a thamral leh ta phawt - Blues hian Nilaini zan khan League Cup last 16-ah Newcastle United an lenchilh a, 2-0 in an tlawm.

Blues hian kartawp Premier League inkhelah khan Magpies hi 2-1 in an hneh a, an inkhelhna hi Stamford Bridge a nih avangin fans tam takin result awm takah an ngai.

St. James' Park an lenluh ve meuh chuan Chelsea thawnthu chu thlak danglam sakin an awm a, Newcastle lakah 2-0 in an tlawm. Mualneitu team tan Alexander Isak leh Axel Disasi (own goal) ten goal khat ve ve an khung a, Chelsea-in a chhanletna tur an nei lo.

Roreltu Magpies

Newcastle khelmuala inkhelah, inkhel ṭantirh aṭangin boruak a 'hot' nghal a, Magpies tan Joelinton chuan post a tih per a, Blues tan Renato Veiga chuan uiawm takin a chance ṭha neih a chhawr thei lo bawk.

Minute 23-naah erawh fan-ten an beisei goal an hmu - tun season inelna hrang hranga goal hnih chiah la khung Alexander Isak chuan a mangchhiate thlah a duh tih pholangin goal hmahruai a khung a, thawm chu ring tak a ni.

Rei a ngai lo. Minute thum a liam a, Newcastle bawkin goal an khung nawn. Isak-a cross aṭanga ball kal chu Joe Willock chuan lo tauh thawiin, Chelsea defender Disasi leh goalkeeper Filip Jörgensen ten dan an tumna lamah chesualin, Disasi hian an lamah a tilut.

Beiseina thamral

Chelsea-in 2-0 a si phur chungin chawlhlawk an hmang a, mahse, second half-ah pawh an comeback thei chuang lo. Joao Felix-a'n Magpies keeper Nick Pope chiah a hmachhawn chungin goal-ah a chantir thei lo a, uiawm a tling.

Bench aṭanga luhtir Noni Madueke-a'n Blues boruak tinung sawt mah se, goal a khung thei bik lo a, William Osula-a'n Newcastle tana an goal thumna khung theihna chance a hlohte pawh teuh ther ther tak a ni.

Blues manager Maresca-a'n a chhawr rim deuh player-te chawlh hahdamtir nan a hmang a, 2-0 a an hnufual hnuah pawh thiampuipa Cole Palmer a luhtir duh lo. A tawpah chuan Chelsea an tlawm a, nomawi beiseina pakhatin a tlem leh ta.