Goal khung nuam ti Arsenal

Championship club Preston North End khelmualah Arsenal an lenglut a, Mikel Arteta naute hian goal thum an khung a, an lamah goal lut a awm lo thung - League Cup quarterfinal an inpetkai a, December thlaah semifinal luh inchuhin Crystal Palace an hmachhawn ang.

Gunners tan hian Gabriel Jesus, Ethan Nwaneri leh Kai Havertz ten goal khat ṭheuh an khung a, Championship club-in mahni mualah khel mah se, an tan Premier League champion tum ngam Arsenal an lian lutuk hret a, 3-0 in an tlawm.

Gunners tan Gabriel Jesus chuan minute 24-naah goal hmahruai a khung a, Brazilian striker tan January thla hnua Gunners jersey nena goal a khung leh hmasak ber a ni.

Arsenal-in an goal hnihna khung turin hun an mamawh rei lo - minute 33-naah kum 17 mi midfielder Nwaneri chuan ṭha zetin an goal hnihna a khung a, minute 57-naah substitute Havertz chuan a hnu a khar.

Kum 17 mi lek ni chungin Nwaneri-a'n tun season-a a goal thumna a khung a, a goal khungte hi League Cup-a a khung vek a ni thung. Nwaneri hian Gunners tan tun season-ah league match li khel tawhin bench aṭang vekin a lut a, League Cup-ah match hnih khel tawhin, goal thum a khung thung.

Arsenal boss Arteta chuan, "Player theihna nei sang tak a ni a, a chhehvela awm turin player ṭha tak tak an awm bawk. A pawimawh ber chu a ṭhan tur anga a ṭhan zel theih nana kan enkawl hi a ni," a ti a, English rawlthar chungchangah a ṭawng fimkhur hle.

September 2022 khan Nwaneri hian Premier League-a inlan thei naupang ber record a lo siam tawh a, Brentford lakah bench aṭanga lutin, khatihlai khan kum 15 leh ni 181 mi a ni.

Arteta chuan, "Club tana hmun pawimawh zawk a chan leh chan loh chu ama kuta innghat a ni a, tun dinhmunah chuan min tilawm hle. Rilru paukhauh tak a ni a, khelmual a luh tawh chuan thil engemaw tak thlentir a duh ṭhin.

"Midangte zahthiam tak, thawkrim em em, inkhelh nuam ti tak a ni. Ni tin hian a theihna a pholang zel a, a khelhpuite lahin a chet ṭhat duha ball an pek hnemzia kha inhmu ang - amah pui turin player tam tak kan nei a ni," a ti a, a nau chuan hma a sawn zel a beisei.