Santosh Trophy atan Mizoram inbuatsaih ṭha

78th National Football Championship for Santosh Trophy 2024-25 atan Mizoram chuan inbuatsaihna an kalpui mek. Mizoram hi I League-a Aizawl FC enkawl tawhtu B. Malsawmzuala'n a kaihruai dawn a, Mizo football legend S. Malsawmtluanga'n manager hna a chelh ang.

Mizoram team hian RG Stadium-ah training an kalpui a, nimin zing khan I League khel tura inbuatsaih mek Aizawl FC nen friendly match khelin 2-1 in hnehna an chang. Santosh Trophy-ah hian player 22 hruai theih a ni a, Mizoram hian squad an la tifel lo.

Inelna hnuhnung berah Mizoram hian semifinal an lut a, kuminah hian semifinal lut pha tho Manipur bakah Tripura leh Sikkim te nen group D-ah an awm ho. Mizoram awmna bik group stage hi Agartala, Tripura-in a thleng dawn.

Group stage hi November 15, Zirtawpni aṭangin Umakanta Mini Stadium-ah khelh a ni dawn a, Mizoramin inelna thlengtu Tripura an hmachhawn nghal ang.

Ni khatah match hnih zel awmin, match leh match inkarah ni khat zel an awm a. Mizoram hian November 17, Pathianniah Manipur an hmachhawn dawn a, he inkhel hian ngaihven a hlawh dawn. Nikum khan Mizoramin semifinal lut mah se, final round group stage-ah Manipur hi 4-1 ngawtin an hneh lo.

Group match hnuhnung ber hi November 19, Thawhlehniah khelh a ni ang a, Mizoramin Sikkim an hmachhawn ang. Mizoram hian nikum khan group stage-ah Sikkim hi 1-0 in an hneh.