Vawiinah Chess inelna zo dawn

Mizoram chess inelna ngaihhlut hlawh 12th David Memorial Chess Championship 2024 chu October 30, Nilaini aṭang khan Ramhlun Indoor Stadium, Aizawlah khelh a ni a, vawiin hian a kharna hun hman a ni ang.

Tun ṭum inelnaah hian Sriram Jha a tel a, ani hi Indian chess Grandmaster niin FIDE World Cup 2009-ah pawh a tel tawh. Inelna hi FIDE Rating Tournament a nih avangin chief arbiter-ah pawh International Arbiter (IA) a ngai a, Mizo zingah IA an awm loh avangin Tripura aṭangin Anupam Bhattacharjee chah chhuah a ni.

12th David Memorial Chess Championship-ah hian Mizoram district pakua aṭangin player an kal khawm a, state pawn aṭanga rawn tel mi 10 awmin player 108-in inelna hi an hmachhawn.

Inelna hi open bakah kum bithliah inelna Under 9, Under 11, Under 13, Under 15, Under 17 leh veteran te a awm bawk.