Spurs-in City an pet chhuak

League Cup-ah Manchester City tan beisei tur a awm tawh lo - Tottenham Hotspur chuan Premier League champion hi 2-1 in an hneh a, Carabao Cup round of 16 aṭangin tun hnaia English football thununtu club an pet chhuak.

Mualneitu Spurs tan Timo Werner leh Pape Sarr ten goal khat ve ve an khung a, City tana Matheus Nunes goal khung chu scoreline cheimawitu mai a ni. A tawpah Spurs an chak a, City zinkawng a tawp.

Ange Postecoglou-a enkawl Tottenham hian quarterfinal-ah Manchester United an hmachhawn zui dawn a, Erik ten Hag ban hlim club hi an coach lakluh a zirin tum an châkawmin an châkawm lo thei ang.

First half hmuhnawm

Tottenham khelmualah first half chhungin goal thum kan hmu nghal a, inkhel hmuhnawm tia chhal ngam a ni - Spurs tan minute ngana lekah Timo Werner chuan goal hmahruai a khung a, minute 20 hnuah Pape Sarr chuan yard 25 vela hla aṭangin an goal a belhchhah bawk.

City tan Matheus Nunes chuan first half hun pek belhah si phurh a sut ṭhen a, Manchester City manager Pep Guardiola-a'n a chhawr ṭhan loh player rual chhawr mah se, an club squad chhahzia enin Spurs laka chak tum ngam tur chu an la ni tho.

Pep-a'n tlawm duh loin second half-ah player langsar Joško Gvardiol, Mateo Kovačić leh Bernardo Silva te ho luhtir mah se, goal an hlawh chhuak chuang lo a, bench-ah Erling Haaland a awm tluan thung - Nico O'Reilly-a khung ngei tur nia lang Yves Bissouma-a'n goal line-a a lo dante kha an thlirkir ang a, an ui vawng vawng ang.

Spurs lawmna

City an chak zo lo a, hei aia mualpho zawk thei an ni hial. Ederson aia si ban nghak tura lut Stefan Ortega chet ṭhat zan a ni a, Brennan Johnson, Dejan Kulusevki leh Richarlison te khung ngei tur nia lang a dansak.

Tun season-a a vawi khat nana goal khungtu Werner pawhin khung belhchhahna remchang a nei a, mahse, German forward hian uiawm takin a chance neih ṭhat goal-ah a chantir thei lo.

A tawpah chuan chak phu zawk Tottenham Hotspur-in hnehna an chang tiin a sawi theih a, Premier League-a beisei anga season hmang lo team hian League Cup-a City an hneh avangin inrintawkna an nei sawt ang.

Spurs beiseina

Tottenham boss Ange Postecoglou-a'n a club a enkawl season hnihnaah champion nomawi a chawi ṭhin thu a sawi tawh a, 2008-a League Cup champion an nih hnua eng nomawi mah la chawi lo club hian an coach sulhnu hi a thlen nawn an beisei.

Spurs hi Premier League match kuaah vawi li an tlawm tawh a, champion ai chuan season thara Champions League khelh phak leh phak loh thlir chu an tihtheih a ni - hetihlai hian League Cup, FA Cup leh Europa League-ah beisei tur an la nei thung.

League Cup-ah quarterfinal an lut a, FA Cup-ah third round khelh an la hmabak a, Europa League-ah match thum khel tawhin an chak vek bawk. League lama beisei an phak loh season hi cup inelna lama insawrbing nana an hman chuan, an nomawi chawi season a ni ve daih thei.

Tlarhnung pawp

Spurs-in City an pet chhuak a, tun season-a Manchester City an tlawm hmasak ber a ni. Hetihrual hian Pep-a team hi tun season-ah an tlarhnung a pawp nasa a, Spanish coach tan hei hi chinfel thuai loh chuan inelna dang thlengin a pawi thui thei ang.

City hian league match kua an khelh tawhah goal chhuah loh hi vawi hnih chauh an la nei a, League Cup-a match hnih an khelhah goal an chhuah ve ve bawk - Champions League-ah erawh goal an la chhuah miah loh thung.

Hetihrual hian UCL lamah City an vannei tiin a sawi theih a, match hmasa berah Serie A champion Inter Milan (0-0) an hmachhawn tih loh chu club lian an la tum tlat lo - an hmachhawn tawh club dang pahnih hi Slovan Bratislava (4-0) leh Sparta Prague (5-0) an ni.

Van a duai

City an tlawm a ni satliah lo a, player inhliam an neih belh nual - Nilaini zan khan Premier League champion tan chuan zan duhawm lo tia chhal hial tlak a ni! Khel ṭha em em mai Savinho chu hliam vanga lakchhuah a ngai a, City tan a pawi thei.

Savinho hi zawnchhuah a ngai a, he thu buatsaih a nih lai hian Pep-a'n a chawlh chen tur a la sawi thei lo. A tira inkhel bul ṭan tur zinga mi Manuel Akanji chu inkhelh hmaa hliam tenau a neih avangin a inlan lo a, a thlaktu Ruben Dias pawh lakchhuah a ngai tho - he thu buatsaih a nih lai hian thuchiang a la awm lo.

Spurs lawm a kim bik lo. Goal khungtu Werner leh Cristian Romero te lakchhuah an ngai a, coach Postecoglou chuan an serious loh a beisei thu a sawi. Micky van de Ven chu hliam vang thoin lakchhuah a ngai a, he thu buatsaih a nih lai hian a dinhmun a la chiang lo bawk.