Tour de Hmuifang 2024-ah Ronel Singh pakhatna

Mizoram Cycling Association (MiCA), Tourism Department leh North Eastern Council (NEC) ṭangkawpin an buatsaih Mizoram a thirsakawr intlansiak ropui ber Tour de Hmuifang vawi 4-na elite category-ah K. Ronel Singh chu pakhatna a ni a, Manipur cyclist hi kumin National MTB Championship-a gold medalist a ni.

Elite category tlan thui zawng hi 82 km a ni a; Aizawl - Tuirial - Khumtung - Hmawngkawn - Chawilung - Lamchhip - Hmuifang lamtluang chu mountain bike hmangin an intlansiak. Ronel Singh hian darkar 3:27:00 a mamawh a, pahnihna pawh Manipur cyclist tho Khariksing Adonis niin darkar 3:27:06 ah a thleng.

Nikum pakhatna Mesak Vanlalvena, Sihfa, chu pathumna niin darkar 3:41:21-ah a thleng. Kumin Tour de Hmuifangah hian inelna category panga awmin, Tourism minister Lalrinpuii chuan nimin zing khan Aizawl Vanapa Hall kawt aṭangin a vai liam.

Hmuifang Tourist Resort-ah lawmman semna neih a ni a, Tourism director R. Lalrodingi chuan MiCA leh Tourism Department te chu thawhho zel a duh thu a sawi. TdH 2024-ah hian cyclist 48 telin Mizoram pawn aṭangin mi 13 an tel a ni.