Mumang ramah Ruud leh Man United

Manchester United-in Erik ten Hag an ban hnua an match hmasa berah result duhawm an hlawh chhuak nghal a, club legend Ruud van Nistelrooy hoin Leicester City 5-2 in an sawp. Old Trafford-a Ruud-a thuneihna chelh hun chhung hi a rei lo a ni thei a, mah se a goal khung vanga lawm ṭhin club ṭantute chu a team enkawl danah pawh an hlim ngei ang.

Nilaini zan League Cup last 16 inkhelah Man United tan Casemiro leh Bruno Fernandes ten goal hnih ve ve khungin Alejandro Garnacho-a'n goal khat a khung bawk. Ruud-a enkawl ṭumah buaina zawng zawng a kiang lo a, an tlarhnung pawp erawh chinfel a ni lo. Foxes tan Bilal El Khannouss leh Conor Coady ten an khung ve bawk.

A dang hret

Manchester United hian kartawpah Chelsea mikhual dawn mah se Ruud Van Nistelrooy-a'n hnehna chan hmasak phawt a ṭul tih a hria a, player ṭha a chhawr. Goalkeeper-ah erawh Altay Bayindır khelhna hun a pe a, defence laiah Matthijs de Ligt leh Victor Lindelöf te a inkawptir.

Noussair Mazraoui chu bench-ah awmin Lisandro Martínez chu left back-ah a chhawr a, Diogo Dalot-a'n right back hna a chelh. Midfield tichak turin Casemiro leh Manuel Ugarte te a inkawptir a, tlarhmaah Dutch forward Joshua Zirkzee chu Rasmus Hojlund aiah a thlang. Zirkzee hi Marcus Rashford, Fernandes leh Garnacho ten an thlawp.

A goal mawlh mawlh

Manchester United hian match hnuhnung pariatah vawi khat chauh an chak a, Premier League club lakah goal khung an harsat. Inelna hi League Cup last 16 ni mah se an khingpui hi Premier League club an ni a, chet sual ve theih a ni.

Mahse, Man United-in goal khung turin hun rei an mamawh lo. Minute 15-naah Casemiro-a'n box pawn aṭangin kawh zetin goal kilah a pet lut a, Old Trafford-ah hlauhthawnna chu lawmnain a inthlak.

Minute 28-naah Casemiro ball pek chu Dalot-a'n ding lam aṭangin a cross a, vengtu nei lo Garnacho-a'n chiang zetin a pet goal. Mahse, El Khannouss-a'n minute 33-naah Foxes si phurh a sut ṭhen a, goal ban pahnih a per avangin keeper Bayindir dem theih a ni lo.

Foxes an phur hmain minute 36-naah Fernandes-a'n freekick aṭangin a khung a, minute 41-naah Casemiro bawk a rawn lang a, goal ban a tauh per hnuah a per let chu kawh zetin a volley lut. Tlarhnung pherh vangin first half injury time-ah United-in goal an chhuah a, Foxes tan Coady-a'n a khung.

Second half-ah Foxes defender tihsual chu Fernandes-a'n remchangah lain goalkeeper Danny Ward a bum hnuah chiang zetin hnai tak aṭangin a khung. United-in inkhel an thunun zui a, goal hmaah Amad Diallo a hriam tawk lo a, Fernandes-a'n hattrick siam theihna hun ṭha a bawhpelh bawk.

Ruud a lawm

Man United-in Jose Mourinho an ban a, Ole Gunnar Solskjaer-a'n a enkawl hmasak ber khan Cardiff lakah goal nga an khung nghal. Van Nistelrooy chuan, "Ole pawh ka hrilh ang," tiin a match hmasa bera thil thlen dan chu a ṭhianpa hrilh a tum thu a sawi.

United-in David Moyes an ban ṭumah pawhin Ryan Giggs-a'n a enkawl a, 4-0 in Norwich an sawp. Solskjaer an ban zawhah pawh Michael Carrick-a'n enkawlin 2-0 in Villarreal an hneh. Manager ban zawh hlimah United an che ṭha ṭhin a, hun rei erawh a daih ṭhin lo.

Club thuneituten Ruud chungah rinna an nghah a rinawm lo a, chutihrualin Dutch manager hian Pathiannia Chelsea an mikhual hunah thuneihna a chelh a rinawm thung.

Nistelrooy chuan, "Ka theihna zawn apianga Man United pui turin ka inpeih. An mamawh chhung chu ka pui thei a, eng pawh thleng se he club chunga ka rilru put hmang hi ka thlak lo ang," tiin Man United a hmangaih thu a sawi a, club ṭantute zingah pawh duhtu an ṭhahnem ang. Mahse, Man United-in Ten Hag thlak nan Ruben Amorim an be fel tawha ngaih a ni.