Zanin dar 7-ah Inter Village Futsal Final : Durtlang Vs Zonuam
BR Studio MFA Inter Village Futsal Tournament hmawr bawkna chu zanin dar 7:00 hian R. Dengṭhuama Indoor Stadium-ah Durtlang leh Zonuam ten an inkhel dawn a, Mizoram veng/khua futsal champion thar an awm dawn. LPS Youth Icon Lalsangliana leh top 8-a lang pha Lalruatkima te an zai dawn.
Zonuam hian final lut turin Dawrpui 6-1 in an sawp a, Durtlang aia ni khata hahdamna hun an neih ṭhat bakah futsal-a tawnhriat an neih ṭhat zawk avangin an buk a rit zawk ang. Mahse, Durtlang hi Ricky Lallawmawma telna an ni a, Chanmari hneh theitu an ni tih hriat a ṭha bawk.
Durtlang hun
Durtlangin Red Ribbon 2012 final-a an hneh loh Chanmari lakah futsal hmangin phuba an la a, inkhel inhnehtawk takah a vannei zawkah an ṭang.
Durtlang hian futsal khel thiam Chanmari lakah 3-0 in hma hruai mah se first half-ah vek 4-3 in an lehthal. Second half-ah Durtlangin goal hnih khung belhin 5-4 ni hman mah se a tawpah 5-5 a ni.
Extra time khelh a ni a, inkhel hmuhnawm bikah Durtlang an dingchang zawk a, 7-6 in hnehna an chang. Durtlang tan hattrick siamtu Marcus Malsawmzuala leh goal hnih khungtu Lalmuanzova Khawlhring te an pawimawh a, mah se player langsar ber erawh ISL club Jamshedpur player hlui Ricky-a a ni.
Final chu
Zonuam hian MFA Futsal League club an nei mek a, player-te hi an inhrechiang hlawm hle. Tun ṭum inelnaah ISL, I League leh MPL bakah state league sang ber khel player-te khelh an phalsak lo a, Zonuam hian an vanneihpui.
Chutihrualin football player ṭhate pawh tel theih ni se futsal-ah chuan Zonuam chu an la ṭha tho ang. Captain Lalṭhazuala'n (Puitea) team a ho ṭha a, goal hmaah Peter Lalzuiliana leh Lalhruaizela te an hriam bawk.
Inelna a sang tulh tulh a, an ṭha telh telh emaw tih mai tur a ni. Zonuam hian Ramhlun South leh Tuivamit te penalty hmangin hneh hram mah se Aizawl Venglai leh Dawrpui te an sawp thei tlat.
Mahse, final-a an khingpui tur Durtlang hi futsal ground awm tamna a ni a, hei vang hian futsal-ah an mikhual lo. Tun season-a Ricky-a'n club khelhna a nei lo hi, an ṭhatpui takzet. Tlarhma leh tlarhnungah Ricky hi a ṭangkai a, Muanzova leh Marcus te an thlawp ṭhat bawk avangin final hial an thleng. Final kalkawng thlirin Durtlang a hautak zawkah a ngai theih a, chuvangin dah hniam nghal ngawt a rem lo ang.