Mizoram Premier League club 23-na tur MLS FC nge Kanan FC ni dawn?

Mizoram Premier League season 11 khelh zawh a ni tawh a, Mizoram chhunga club inelna sang ber hi club 22-in an hmachhawn tawh. Vawiin hian MPL12 Qualifier match hnuhnung ber khelh a ni dawn a, MPL club thar an awm dawn.

Chawhnu dar 2:30 hian Lawngtlai club MLS FC leh ADFA First Division champion hlim Kanan FC te an inkhel ang. MFA Cup champion lai MLS FC tan draw chauh ni loin goal khata chak loh pawhin MPL an khel dawn a, Chawngthansanga enkawl Kanan tan erawh goal hnih tala chak a ngai thung.

Qualifier-ah hian team pathum an tel a, MLS FC leh Kanan FC bakah Ramhlun North te an inel. Laldampuia enkawl Ramhlun North erawhin MLS 2-0 a an hneh loh avangin playoff aṭang bakin MPL khelh theih a ni tawh lo.

MPL khelh châk

Lawngtlai club MLS hian MPL khelh tumin MPL11 qualifier pawh an hmachhawn tawh a, mah se inelna takah beisei an pha lo. Kuminah erawh tawnhriat nei tawh an ni a, match hmasa bera Ramhlun North an hneh avangin dinhmun ṭhaah an ding.

Hetichung hian coach Vanlalpeka erawh a la ṭawng huai duh lo. MPL club pawh lo enkawl tawhtu Peka chuan, "Kanan leh Ramhlun North khel kha a hmunah kan en a, Kanan kha engkimah an chungnung. Awihawm loh khawpin goal chance an miss nasa. Kanan enkawltu Sir Chawnga'n a player-te a hre chiang a, game-ah an buai dawn lo.

"Keini hi full squad-a kan khelh vawi khatna a ni a, game khelh a la har a, structuce sang pawh kan hmang ngam lo. Kanan team game ṭhatzia kan hria a, kan tum ram thleng tur chuan kan theihtawp tak meuh meuh kan chhuah a ngai dawn a ni," tiin Vanglaini a hrilh.

Lawngtlaiin MPL club an la nei ngai lo a, MLS FC hi Lawngtlai aṭanga MPL khel hmasa ber ni turin an dinhmun a ṭha hle.

Kanan hun?

MPL hmasa ber playoff aṭangin Kanan FC hi an vanduai tawh a, kum 10 a liam hnuah pawh MPL an la khel thei lo. Kuminah coach Chawngthansanga hoin ADFA First Division-ah an champion a, mah se MPL Qualifier-ah league round-a an hneh Ramhlun North an hneh loh avangin hun ṭha her liam leh thei dinhmunah a ding.

Kanan tan MPL khel nghal turin goal hnih tala chak a ngai dawn a, a awlsam dawn lo. Hei chauh hi a ni lo, playoff khel tur pawhin Lawngtlai club hi an hneh hrim hrim a ngai. Chawnga hote hian chak hmel an hmuh loh chuan playoff pawh an khel pha dawn lo a, MPL beiseina chhi nung turin goal khat tala chak a ngai.

Chawnga chuan, "Chhuanlam awm tur tan hmun a awm lo. Kanan FC tana ke tliak ngam, rilru huaisen mi kan nih a ngai ta," tiin a naute a fuih a, RG Stadium-ah Kanan FC fiahin an awm dawn.

MPL12 qualifier-ah hian point hmu sang berin season tharah MPL an khel dawn a, pahnihnain MPL11-a pasarihna Chawnpui FC nen playoff an khel dawn. Playoff hi double leg-a khelh tur a ni dawn a, November 4, Thawhṭanni leh November 6, Nilaini-ah khelh a ni ang.