Milan hnehtu Napoli an káng sáng!
Romelu Lukaku leh Khvicha Kvaratskhelia te goal khung hmangin Napoli chuan AC Milan 2-0 in an luhchhuah a, coach ṭha Antonio Conte enkawl hian Serie A hmahruaitu an nihna an sawhnghet.
Naples club hian Serie A match 10 aṭanga point 25 hmuin a chung berah an awm, pahnihna Inter Milan chuan point 18 an hmu thung - Italian champion lai Inter hian match khatin an khel tlem a, an inkar tihzim hret theihna hun erawh an nei.
Conte-a Napoli
An inkhelhna hmun chu San Siro a ni a, mualneitu AC Milan hi team khawng ve tak an ni bawk. Mahse, Paulo Fonseca enkawl Milan hian a tir lamah Romelu Lukaku an ngam lo nghal, goal an chhuah hma hle a ni.
Minute ngana lekah Lukaku hian amah vengtu pakhat zawk defender Strahinja Pavlovic chu a nek tlu a, kum 23 mi Pavlovic hi 6ft 4in zeta sang ni mah se Belgian striker tharum ngah hi a nek hneh lo hle.
Lukaku hian tun season Serie A-a a goal lina ni turin a khung, amah vengtu a nek per hnuin goalkeeper Mike Maignan tana dan theih lohin a khung a, striker goal ṭha tak tia sawi theih a ni - Conte enkawlna hnuaiah a vul chho hle.
Milan tan midfielder Yunus Musah chuan sut theihna remchang a hmi, mahse pet ṭha viau mah se goal ban hrulah a liam chiah - Napoli an him hram. Chawlhlawk hmain goal kan hmu zui, a khungtu chu mikhual team bawk an ni.
Winger Khvicha Kvaratskhelia chuan hla deuh takah ball a chang a, hlauhawm ni pawhin a lang lo. Mahse, box bul hnai lamah a tlan pui zel a, defender leh goalkeeper Maignan pawhin a la pet dawn lo emaw a tih hnuah a pet thut a, goal kilah mawi zetin a lut.
Milan lamin striekr Alvaro Morata hmangin goal khat sut ṭhenah an inngai, mahse video assistant referee (VAR) hmanga ennawn a nih hnuah offside tih hmuh a ni a, hnawlsak niin goal dang a lut zui tawh lo - mikhual team lamin point thum an hlawh chhuak.
Nomawi chuh ngam
Tun season Serie A an khelh dawn khan champion tur inrinsiak ni se la Napoli ringtu an tam lo ang, champion lai Inter Milan bakah Juventus leh AC Milan te chu buk rir tur an ni, tun hnai an sulhnu en pawhin an inhmeh hle.
Mahse, Napoli hian manager ṭha leh tawnhriat nei ṭha Conte an la lut a, ani hi player a nih lai leh coach a nih hnu pawha Italian football hrechiangtu a ni a, hun rei lote chhung thil a thlak danglam hlawk.
Italian manager hian nipui bazarah player an lak nual avangin insiamrem nan hun an mamawh tih a sawi ṭhin a, an league match hmasa berah pawh an tlawm nghal. Mahse, rang taka insiamṭha nghalin hnung lam an hawikir leh tawh lo.
Conte chuan, "Serie A match 10 kan khelh aṭanga kan dinhmun hi chu ka suangtuah phak loh thil a ni, tun ang hmuna kan awm hi ka ring ngai lo, mahse tih takzeta kan beih chuan a theih a ni tih a takin kan hmu.
"Tunah hian kan hma hun thui tak sawi theih a la ni lo, European football khelh phak chu kan tum hmasak tur a ni a, chumi tihlawhtling tur chuan ka chungah hian mawhphurhna sang tak pawh a awm, hlen chhuak turin kan bei tlang ang.
"Nomawi chungchang zawhna kan dawng ṭhin, champion beisei lo ni ila kan tan inkhelhin awmzia a nei lo ang. Inelna kan hmachhawn a nih chuan champion ngei tumin kan theihtawp kan chhuah tur a ni, beiseina pawh kan nei zel ang," a ti.