RedBull Aizawl Tlangruam: A hun a thleng ta

India rama urban downhill mountain biking event hmasa ber RedBull Aizawl Tlangruam chu vawiin hian neih a ni dawn. Inelna hi Mizoram sorkar, Mizoram Cyclist Association (MICA) RedBull leh Hyundai te ṭangkawpin an buatsaih a ni a, nimin khan practice session hlawhtling taka neih a ni a, inelna tak hi vawiin chhun dar 12:00 aṭangin inelna tak tak neih a ni ang.

Inelna kal hmang

Vawiin hian practice session a awm leh dawn a, chawhma dar 9:30 - 10:00-ah neih a ni ang. Qualifying round hi chawhma 10:30 - 11:00 inkarah neih a ni lehnghal ang a, biker mi 21 aṭangin tlan ṭha mi 15 chuan inelna tak an hmachhawn ang.

A ti ṭha hi an tlan chak dan aṭangin teh a ni dawn. Final race-ah hian Hawla Indoor Stadium-ah pakhatna aṭanga pathumna tan ṭhuthleng dah a ni ang a, a tlan chak pathum zel an ṭhu ang. A hnuhnunga mi an tlan chak zawk chuan a ṭhu hmasaten ṭhutna an lo kian leh zel dawn.

Tlan Kawng

Thlanna hmun hi Upper Republic Veng Presbyterian biak in aṭanga ṭanin Holy Heart School bul kawng chhukah tlan thlain Republic Veng YMA lung phun Vawmluta step-ah tla thla lehin Challiana Step aṭangin Republic Vengthlang Presbyterian biak in an pan dawn.

Heta ṭang hian vei lamah pengin BCM biak in aṭangin Hawla Stadium step-ah tlan thlain Hawla Indoor Stadium-ah a tawp ang.

A hmuhnawm dawn

Intlansiak tur mi 21 zingah Mizo pathum an awm. Lungdai tlangval C. Lalhriatdika bakah Republic Veng tlangval pahnih Cyebe Lalsangbera leh Alan Renthlei te an inlan dawn a, intlansiak entute ṭan rawn an ni ang.

India ram pawn aṭangin mi pali an tel a, Taiwan aṭanga rawn tel Chiang Sheng Sha-a'n record a nei ṭha. Downhill Festival-ah Asian champion vawi li a ni tawh. Indian zingah Khasi biker Aaronson Oniel Kharpuri-a'n record a nei ṭha a, Mizorama neih Reiek Downhill-ah pawh pahnihna a rawn ni tawh.

RedBull Aizawl Tlangruamah hian Tomas Slavik (Czech Republic) Pedro Burns (Chile) leh Jeronimo Paez (Argentina) ten an endik dawn a, anni pawh hi an inlan dawn. Mahse, khawvel huap pawha tlang pha rider pathum hi inelnaah an tel ve lo thung.

Tun ṭuma pakhatna hi South America lama neih tur Red Bull Cerro Abajo-ah an inlan ang.

A duh apiang tan

RedBull Aizawl Tlangruam hi a duh apiang tan a en theih a, en man a awm dawn lo. Kalkawngah hian dai danna an dah ang a, chumi sir aṭang chuan a en theih zel dawn.

Tun ṭum hi Mizorama vawi khat neihna tur a nih avangin ngaihhlut a hlawh dawn a, inelna neihna hmuna chengte ringawt pawhin en se entu mawi tham an awm dawn. Mahse, tun ṭuma inelna hi Mizoram pum huap inelna ni ringawt loin Asia khawmualpui tana inelna a ni a, Aizawl hmun hrang hrang aṭangin mountain biking lam tuipuitute an fuam khawm ang.

Mizorama event neih theih nan Miller B. Renthlei a pawimawh a, youtube lama a video phochhuah zarah tun hun hi Aizawlah neih phah a ni.