Aston Villa-in ISL club an duh

Championship club Aston Villa neitu thar Dr. Tony Jiantong Xia chuan Indian Super League-ah club neihve ngei a duh thu a sawi chhuak leh ta. Chinese sumdawng hausa hian Aston Villa chu pound maktaduai 76-in a lei tawh a, ISL club nei tur hian sum lamah a buaiin a rinawm loh.

Recon Group hotupa ni bawk chuan, "Tunah hian ISL club lei thei dinhmunah kan ding mek a, league dinhmun kan zirchian mek bakah India rama football-in hma a sawn dan pawh kan thlithlai mek a ni. Ka ngaihdan chuan Indian football hi a ṭhang chak em em a, khawvel ram lian ber zinga miah hetiang taka football a ṭhan chuan ngaihthah chi a ni lo," a ti.

Massachusetts Insti-tute of Technology (MIT) zirchhuak Dr. Tony Xia hian Aston Villa hmangin a sumdawnna a zauh zel a, India ramah football academy an hawn tur thu kar hmasa khan a lo puang tawh.

Hetihlai hian Delhi Dynamos chuan season thar aṭanga an player turin Bruno Pelissari an lalut a, Brazilian midfielder hi season hmasaa Chennaiyin FC-in ISL nomawi an chawina kawnga an player pawimawh pawl a ni.