MPL11 : Aizawl FC record hi eng ang chiaha ropui nge?

LZ Juice MPL11-ah Aizawl FC-in hneh loh nei loin an champion a, Victor Lalbiakmawia hote hian season khat chhunga hneh loh nei loa champion hmasa ber an ni.

I League club hian October 15, Thawhlehni zan khan champion lai Mizoram Police chu 1-0 in an hneh a, goal awmchhun hi Lalawmpuia Sailo-in minute 36-naah a khung.

Aizawl FC tan MPL-a an vawi nga champion-na a nih bakah Covid-19 hnua an champion lehna hmasa ber a ni a, foreigner tel loa an champion hmasa ber a ni bawk.

A ropui e

MPL-ah Aizawl FC hian champion ngun ber record an siam a, vawi nga an champion tawh. I League club tih loa vawi khat aia tam champion thei chu Chanmari FC an ni a, vawi hnih an champion.

Aizawl FC hi an elpui Chanmari FC champion let an champion a, an record hi a ropui hle. MPL-ah hian Chawnpui FC, Chhinga Veng FC, Dinthar FC leh Mizoram Police FC te vawi khat ṭheuh an champion.

Tun season bika Victor-a hnuai an record pawh a ropui. Foreigner tel loa khel chungin hneh loh nei loin an champion a, MPL season 10 neih tawha la thleng ngai loh a nih avangin sawi nep theih a ni lo.

Hei chauh hi a ni lo, league round-ah ringawt Aizawl FC hian goal 44 an khung a, league round-a goal khung tam ber record an siam. Season dangah league round-a goal 40 khung tling an la awm ngai lo. MPL8-ah Aizawl FC-in goal 37 an khung a, MPL4-ah goal 35 khungin MPL3-ah goal 33 an khung leh bawk.

Aizawl FC tih loa goal 30 khung tling thei chu Chanmari FC an ni a, MPL2-ah khan H. Vanlalthlanga hoin league round-ah goal 30 an khung an khung.

Invincible chu

MPL season khat bik aṭanga teh chuan Aizawl FC-in hneh loh an tawng miau lo a, a thlen leh mai pawh a rinawm tawh lo. Chutihrualin season khat bik chhiar loh chuan Chanmari FC leh Chhinga Veng FC ten record duhawm tak an hnutchhiah tawh a, anni erawh MPL chauh a ni lo.

H. Vanlalthlanga hnuaiah Chanmari FC-in MPL1 leh MPL2 khan match 21 chhung hneh loh an tawng lo a, an record hi Chhinga Vengin kum 2017 khan tihtawp sak.

Lalsangzuala Hmar hnuaiah Chhingcows hian match 22 chhung hneh loh an tawng lo a, Aizawl FC-in an tihtawpsak. I League club laka an tlawm hnuin Sanga kaihhruai Chhinga Veng hi an chak chho char char a, match 26 chhung hneh loh an tawn loh hnuin Mizoram Police lakah an tlawm.