Swiatek-i coach thar Fissette

Iga Swiatek chuan coach thar atan Wim Fissette a ruai tih a chiang ta a, coach thar nena thawhdun chu a chakin a phur hle tih a sawi kang tel bawk a ni.

Kum 23 mi Swiatek leh a coach hmasa Tomasz Wiktorowski te chu tun thla tir khan an inṭhen, kum thum zet an thawhdun tawh hnuah an inkar an titawp a, a chhan chiang taka tarlan a ni lo.

Polish nula Swiatek hi a nghawng ni pawhin a lang - China rama inelna hoah a inlan lo a, hliam leh damlohna vang ni loin mimal harsatna vanga inhnukdawk a nih thu chu a sawi a ni.

Fissette hian tun hmain player langsar tak tak a lo thawhpui tawh. Grand Slam champion pahnih Kim Clijsters leh Angelique Kerber te a lo kaihruai tawh a, major title pali neitu Naomi Osaka nen pawh an thawkdun tawh.

Japanese star Osaka nen an thawhdun lai hian Grand Slam title pahnih a vaw chhuak a, major title pali a lak zinga pahnih chu Fissette kaihhruaina hnuaiah a la tihna a ni a, kumin September thla khan an inṭhen.

Swiatek chuan, "Tunah hian WTA Finals khel turin ka inbuatsaih mek a, coach thar Win-a nen kan thawkdun thei tur hi ka lawm hle. Tun hnai atan chauh ka ngaihtuah lo a, hun rei tak ka thlir avangin ani nen hian kan inrem.

"A hma lama ka lo sawi tawh ang khan tennis zinkawng chu vawi leh khata tih hluai theih a ni lo, teirei peih a ngai em em a ni. Chutianga zinkawng thui tak zawh tur chuan Wim hi a ṭha," tiin a sawi.

Tennis season a zo hnai tawh a, hmeichhe inelna atan WTA Finals chu November thla tir hian an khel ang. Ranking sang zual pariat ten Riyadh, Saudi Arabia-ah inelna an hmachhawn dawn a ni.