Kan insiamrem mek - Brazil coach

Brazil coach Dorival Junior chuan tun hnaiah an insiamṭha mek tih a sawi a, chutihrualin an team chu an la ngheh tawk loh avangin hmasawnna tur lai an la ngah tih a sawi bawk.

World Cup qualifier-ah Brazil hian a tir lamah beisei an phak lo, tun hnaiah erawh an insiamṭha - an match hnuhnung pahnihah an chak ve ve. Peru lakah 4-0 a an chak avangin an insiamṭha chho viau niin a lang.

Dorival Junior chuan, "Team nghet neih tumin theihtawp kan chhuah a, awlsam taka neih ngawt theih erawh a ni lo. Zawimuangin siamṭhat ngai laite kan siamṭha chho zel a, tunah chuan thui tak kan kal tawh.

"A zawna vawi hnih kan chak avangin kan ṭha ta viau tihna erawh a la ni lo a, kawng dik kan zawh tih erawh a takin kan hmu a ni. Match hautak kan la hmabak nual dawn, tah chuan a la chiang ang," tiin a sawi.

South America ram 10 inel zingah Brazil hi palina an ni mek. November thla hian Venezuela an tlawh dawn a, chumi hnuah an chunga awm Uruguay an mikhual ve leh thung ang.