Premier League: Tlan chak, sprint hnem, tlan tam leh kal thui ber!

Tun season Premeir League-ah match sarih khelh an ni tawh a, Liverpool-in point 18 hmuin hmahruaitu an ni mek. Champion lai Manchester City leh champion tum ngam Arsenal ten hneh loh an la tawng lo a, chutihrualin match 31 khelh tur a la awm avangin champion tur erawh rin thiam a la har hle.

British sports analytics company Opta chuan Premier League an zirchiang a, club tina player tlan chak, sprint hnem, tlan tam leh kal thui ber te an chhawp chhuak. A ngaihnawm hle.

Tlan chak ber

Premier League-ah Fulham forward Adama Traore and Manchester City full-back Kyle Walker te tlan chak vangin an lar ṭhin. Tun season-a tlan chak ber chu centre back a ni daih a, Tottenham defender Micky van de Ven chuan a tlan chak ber laiin 37.1 km/hr a hawlh pha!

Traore hi tun season-ah chuan 21-na a ni chauh a, Walker phei chu 80-naah a tla thla tawh. English wing back Walker hi Liverpool right back Trent Alexander-Arnold (19-na), Manchester United forward Antony (24-na) leh Aston Villa midfielder John McGinn (61-na) te hnungah a awm.

German forward Timo Werner-a'n goal khung harsat deuh mah se tlan chak lamah erawh Manchester City striker Erling Haaland (35.7 km/h) nen an tlan chak dan a inang.

Sprint tam ber

Newcastle forward Anthony Gordon chu tun season-ah a sprint tam ber a, vawi 187 zet chak takin a tlan a, amah hnaih bertu Nicolas Jackson (157) aiin vawi 30 zetin sprint a ngah zawk.

Heta lang chiang deuh chu, team khelh dan hmangin thui tak a nghawng. Manchester City-in manager Pep Guardiola hnuaiah ball an chang tam a, an dawh thei a, a player-te pawh sprint tlem. Haaland-a'n sprint ngah berin vawi 96 chauh a nei a ni.

Player tlan chak ber Van de Ven pawhin vawi 82 sprint a nei a, league pum puiah 74-na a ni pha.

Tlan tam ber

Southampton midfielder Flynn Downes-a'n tun season-ah 84.2 km zet a tlan tawh a, Premier League player zingah a tlan tam ber. Downes hian minute 630 a khel a, darkar khata 8.02 km tlan ang a ni pha.

Tlan tam tur chuan khelh tam a pawimawh a dawn a, hei vang hian minute 90 chhung chawhruala an tlan zat ang zel teh a nih loh chuan hemi tehfung chu a dik tawk lo thung ang.

Match li khel chinah, minute 90 chhunga an tlan zat ang zela teh chuan Dejan Kulusevski a tlan tam fal ber. Kulusevski hian tun season-ah 528 minutes chauh a khel chungin 74 km a tlan pha a, darkar khata 9.57 km tlan ang a ni pha.

Kal thui ber

Football hi minute 90 chhung khelh a ni a, darkar khat leh a chanve chhung hian an tlan reng lo a, kal chang an ngah. Man City striker Erling Haaland hi an club tana chak taka (sprint) ngun ber a nih rualin kal ngun ber a ni bawk.

Haaland-a kal zat hi belhkhawmin 28.2 km thui kal ang a ni. Chutihrualin kal thui lama lang pha player-te hi an club tana sprint tam te an ni hlawm a; Haaland bakah Newcastle winger Gordon, Fulham left back Antonee Robinson, Bournemouth forward Antoine Semenyo, Ispwich full back Leif Davis leh Manchester United full back Diogo Dalot te an tel.

Hei vang hian an club khelh dan phungin an kal tam leh tam loh hi thui tak a nghawngah a ngaih theih a ni.