A hma aia ṭha zawkin ka lo kir leh ang - Pogba

"Beidawnna piah ramah" tia sawi nan chuan a la hma deuh mai thei - beiseina neitu erawh a ni mek. Paul Pogba chuan beiseina nen kum thar a thlir mek a, tun hma zawng aia ṭha zawkin khelmual chhunga kir leh theih a inbeisei.

Damdawi hman phal loh a hman avangin kum 31 mi Pogba hi kum li chhung atan hrem a ni a, mahse infiamna lama thubuai ngaihtuahtu sang ber Court of Arbitration for Sport (CAS) hnenah a zualko a, hremna hi thla 18 atan chauh tih tawisak a ni hial.

Hremna hi kum 2023 September 11 aṭang chhut ṭan a ni a, nakkum January thla aṭangin training a zawm thei ang - March thlaah chuan a inkhel thei leh tawh dawn, hmabak thui tak a la nei thei tura ngaih a ni.

Tihsual palh!

Paul Pogba chuan duh reng vanga thil tisual a ni lo tih a sawi a, he thu hi CAS hnena a zualko dan pawh a ni. CAS hian thil thlengte ngun takin an zirchiang a, a tawpah chuan Pogba hian a tisual lui lo tih hi an pawm dan a ni.

Pogba chuan, "Mi bum a, dawt hmanga che ṭhin ka ni lo. Football hi ka ngaina in ka hmangaih em em a, chuvangin ka infiamna ngainat hi phatsanin ka bum thei ngai lo ang, dik taka hnehna chan duh mi ka ni zawk.

"Kan chak lo a nih pawhin dik taka tlawm zawk nih mai ka duh, bumtu nih erawh ka duh ngai lo. Duh reng vang ni loin ka tisual palh a, dan ka bawhchhia a nih chuan hrem tur pawh ka ni, mahse kum li atan hrem nih kha chu a rei lutuk," a ti.

Tun hma pawhin Pogba anga hun rei tak chhung hrem tawk, mahse thubuai ngaihtuahtu sang lamin a hun an tihtawisak hi an lo awm fo tawh a, hremna leh dan bawhchhiat chungchangah hian ngaihdan inang lo a tam thei hle.

Lu a hai asin

Pogba-a'n damdawi hman phal loh a hman, an hmuh chhuah kha dehydroepiandrosterone (DHEA) a ni a, taksa tih chak thei thil a awm a ni. Hrem a nihna hmasa, kum li chhung atan tih kha kaltlang ni se la chuan a inkhel thawh kher lo ang.

Kum li chhung hrem ta se la, hremna a hman zawh hun chu kum 2027 a ni daih tawh, hetih hunah chuan Pogba hi kum 35 mi a ni tawh ang. Hrem a nih tirh kha chuan inkhelh chawlhsan mai pawh a tum nghal rum rum a, a beidawng ve hle a ni.

Pogba chuan, "Ka beidawng em em a, chumi karah chuan ka nupui hian engtik niah emaw chuan ka la inkhel leh ngei ang tih min hrilh a, hun harsa chu kan pahniha kan paltlang ngei tur thu min hrilh a. Kei leh kan chhungkua chu Pathian hnenah min hlan," a ti.

Pogba leh a nupui Maria Zulay Salaues te hian kum 2019 khan an fa hmasa ber an nei a, kum khat hnuah an fa pahnih an nei leh bawk. Hun harsa a tawh lai takin a nupui hian a hnung lam aṭangin theihtawpin a lo thlawp tihna a ni.

Juve tan chauh

Manchester United tana a contract a hman zawh hnu, kum 2022 July thla khan Pogba hian Juventus a zawm. Hliam vangin a buai a, a hnu lawkah hremna a hmachhawn zui leh bawk - Old Lady tan hian inelna hrang hrangah match 12 bak a khel hman lo.

Pogba chuan, "Khelmual chhunga inkhelh leh ka chakin ka nghakhlel takzet a, khawi khelmualah pawh ka inkhel chak. Mahse, a hmasa leh pawimawh berah chuan Juventus tana khelh ka duhin ka chak bawk.

"Ṭhiante nena training neih te a châkawm, mahni chauh chuan a khawhar thlak a, bang ka pet per mai ṭhin, chumi lo per let leh lo pet chu a ni mai a, training pangngai neih chu ka châk hle," tiin a sawi.

Italian club tan hian kum 2026 nipui lai thleng daih contarct a nei mek a, chanchinbu ṭhenkhatin club dang nena sawizawm tawk lo awm mah se Juventus bak ngaihtuah a nei lo, contract a neih mekna a ni bawk.

Pogba ṭha zawk

Manchester United leh Juventus tan Pogba hian match 423 a khelhsak tawh a, club huangah chuan khawvela a ṭha berte zinga mi a nihna a pho chhuak ching tawh viau a, tun hma aia ṭha zawka khelh erawh a la tum cheu!

Pogba chuan, "Keimah tho kha ka la ni a, hlawhtlin chaka ka tuihal dan erawh a danglam tawh. A hma aiin nomawi chawi chakin ka tuihal a, ka phurin ka thtaho takzet bawk," tiin tun hma lam aia nomawi chawi tam a duh thu a sawi.

Beiseina a neih thu sawi zuiin Pogba chuan, "Tun hma aiin match tin ka ngai pawimawh zual dawn, a chhan chu inkhel thei loa awm kha a hrehawm em em a ni, ka tan a a hlutzia ka hre chhuak chiang ta bawk. Tun hma aia Paul Pogba ṭha zawk nih ka tum," a ti.

Dam ṭha taka awm lai chuan dan hlutzia hi hriatfiah a harsa ṭhin a, damloh chiah hian a chiang ṭhin. Chutiang bawk chuan inkhel thei loa awm mek Pogba hian match khelh theih hlutzia chu a takin a hmufiah chiang ta hle a ni.

World Cup 2026

Club lama a chet ṭhat tawk loh lai pawhin Paul Pogba hi France tan chuan a khel ṭha deuh zel, hei hi an ram pawhin an ṭhatpui - World Cup title pawh a lo lakpui hial tawh a, tunah chuan World Cup 2026 khel turin beiseina a la nei bawk.

Les Bleus tan match 91 a khelh aṭanga goal 11 khungtu Pogba chuan, "World Cup khel tur chuan ram tana khel phak nih a ngai, chumi tur chuan kei pawhin theihtawp chhuaha ka beih a ngai dawn a, hmun chang turin ka thawkrim bawk ang.

"Didier Deschamps hian tunge a koh dawn engmah a la sawi lo, chuvangin player zawng zawngin hun ṭha kan nei niah ka ngai. Harsatna ka tawh rih khan thawkrim zual turin min lo fuih tawh a ni," tiin ram tana inlan leh theih a beisei.

France tana Pogba inlan hnuhnung ber chu kum 2022 March thla daih tawh kha niin South Africa nen friendly match an khel a ni, a awm loh karah an ram hian nomawi chawi an nei lo a, a nihna takah chuan Les Bleus hian Pogba hi an la mamawh.

A harsain a hrehawm!

Paul Pogba chuan hrem nih chu a hrehawm a ti a, chumi tluk zet chuan a hmangaih leh ngainat em em football khel thei loa awm chu hrehawm a ti takzet tih a sawi chuak a, inkhelh leh hlan a nghakhlel hle a ni.

Pogba chuan, "Ka tan chuan kum harsa leh hrawm tak a ni, a hrehawm lai tak chu Juventus khelmual ka lut thei lo a, training-na hmun Continassa pawh ka tlawh thei lo, a chheh velah ka fate sikul kal ka thlah a ngai ṭhin thung.

"Inkhel thei lo leh training thei si lo, a bul vela fate hruai ngai ṭhin chu hrehawm tak a ni," a ti a, hun a harsa a tawh lai hian a ṭhian leh inkhelhpui ṭhinte hnen aṭangin hnemna thu a dawn ṭhin thu a sawi bawk.

France midfielder chuan, "Tuna ka inkhelh pui leh a hma lama ka inkhelh pui ten min hnem ṭhin. Juan Cuadrado nen kan inbe ngun a, thil hlimawm lam a rawn sawi deuh ziah. Paulo Dybala pawhin harsatna ka paltlang thei a ni tih message min thawn.

"Dusan Vlahovic, Weston McKennie, Timothy Weah leh Moise Kean te pawhin min lo hnem, mi tam tak hnen aṭanga thu lawmawm leh hnemna thu dawn chu ka beisei lo a, thil theih pawh a ni lem lo," tiin a sawi.