Mizoram hmeichhe team-in Siliguri an thleng

29th Senior Women's National Football Championship for Rajmata Jijabai Trophy 2024-25 khel tura feh chhuak Mizoram hmeichhe team chuan nimin khan inelna neihna hmun tur Siliguri an thleng. Mizoram hi group H-ah Jharkhand leh Telangana te nen an awm.

Mizoram team hi Malsawmzuala Bawitlung-in an enkawl dawn a, Sawmtea hian I League club Aizawl FC bakah Chawnpui FC pawh a enkawl tawh. Manager atan hmeichhe football hrechiangtu SYS coach R. Lalnunsangi (Manuni) hman a nih avangin Sawmtea tan hna pawh a awlsam phah sawt ang.

Mizoram hian October 19, Inrinni hian match hmasa berah Jharkhand an hmachhawn dawn a, inelna neihna tur Kanchenjunga Stadium hi kum 2014-a Mizoramin Santosh Trophy nomawi an chawina hmun kha a ni.