English coach aiah ram pawn mi!

Hnam induh leh chapo ve tak English tam takin an ram mi aia ram pawn lam coach lakluh a ni chu an hrethiam lo a, Tuchel hi England-in ram pawn lam mi coach tura an lakluh pathumna chiah a ni - a hma hian Sven-Goran Eriksson (2001-06) leh Fabio Capello (2008-12) ten England an lo enkawl tawh.

Manchester United legend Gary Neville chuan tun dinhmuna khawvel coach hna nei lo zinga ṭha ber an lakluh thu sawi mah se English coach a duh tho niin a lang a, Neville chuan, "English coach kan neih zozai aia Tuchel hi ṭha zawk tlata kan hriatna hmang hian keimahni leh keimahni kan invaw chhe mai mai a ni," a ti!

Liverpool legend Jamie Carragher chuan, "England manager chu English mi a ni turah ka ngai - ram pawn lam mi coach kan nei hi ka pai dam thei lo a ni," a ti a, mahse, hetia han ngaihtuah mai pawh hian England enkawl tur English coach hi an vang angreng!

England hian Manchester City manager Pep Guardiola pawh an dawr a, mahse, Pep hian chhanna mumal a pe lo. English coach zingah chuan Newcastle United boss Eddie Howe leh Chelsea manager hlui Graham Potter te pawh sawi rik an ni a, mahse, Tuchel-ah an tlu ta.

FA chief executive Mark Bullingham chuan, "Mi 10 vel kan interview-a, an zingah hian English coach pawh an tel. Mahse, coach zawn hna hi a ruk thei ang berin kan ti a, hetianga kan tih hi keimahni mai ni lo, coach kan interview-te tan pawh a ṭha a ni.

"Thomas nena kan inrem thei hi kan lawm hle a, World Cup nomawi chawina chance sang tak min pein ka hria - kan ngaihdan dik takah chuan England enkawl tura ṭha ber kan la lut a ni," a ti a, Tuchel a ringtawk hle.

Tuchel hian fiamthuin, "German passport chiah ka neih avangin min hrethiam rawh u," a ti - German coach hian, "Vawiina min duh lotute hian nakinah min duh theih nan, English coach ka ni thei hi ka ngaihhlutzia ka lantir theih ka beisei. He hna lah ram hi zahawm taka ka chawisan theih nan ka theihna zawng zawng ka hlan ang," a ti bawk.