England ka enkawl tur hi ka lawm - Tuchel

Thomas Tuchel chuan England enkawl tura rin a ni chu lawmawm a tih thu a sawi a, a tan chawimawina a tlin thu a sawi. German coach chuan, "England team enkawl tura rin ka ni hi ka lawm takzet.

"English football nen hian a mimal tak pawhin inzawmna thuk tak kan nei ni hian ka hre ve tlat a, ka hringnuna thawnthu ngaihnawm tak tak ka lo tawn tawhna hmun a ni. England coach nih hi ka tan chawimawina a ni a, kan player ṭha tak takte nena kan thawk ho thei tur hi ka lawm hle," a ti.

Football Association chief executive Mark Bullingham chuan, "Khawvela coach ṭha ber pawl kan la lut - Thomas leh a thawhpuite hian World Cup 2026 nomawi kan chawi theihna turin tum thuk tak an nei a ni," a ti a, Chelsea boss hlui a ring hle.

World Cup 1966-a an champion hnuah Three Lions hian major trophy an la chawi leh lo a, Gareth Southgate hoin Euro final vawi hnih khel mah se a vanduai zawkah an ṭang ve ve - Tuchel hoin hlawhtlinna thar chhar lah an beisei ang.

Mangṭha nunhlui

Tuchel-a'n sulhnu thlira indawmkun reng a duh lo. German coach chuan, "Infiamna khawvelah theih loh a awm lo. Min thlawp turin FA an awm a, hmeichhe team leh England Under-21 te pawhin nomawi an chawi a, senior team-in kan theih lohna bik tur a awm lo.

"A chang chuan thawnthu hluia inhambuai reng lo a, kan kalsan a ṭul chang a awm ve ṭhin. Kan hmachhawpah rilru kan pek a ṭul a, January aṭangin kan ṭan ang," a ti - Tuchel hian January 2025 aṭangin a hna a ṭan ang.

German coach hian thla 18 atan contract a ziak a, November international break-ah chuan coach lailawk Lee Carsley-a'n team a la enkawl rih dawn. Bayern Munich boss hlui hian contract a ziah rei loh chhan chu, ngaihtuahna sawr bing a duh vang niin a sawi bawk.

Tuchel chuan, "Thla 18 contract avang hian bing takin ngaihtuahna ka seng thei dawn a ni," a ti - a hna hmasa tur chu World Cup 2026-a England inpetkaipui a ni ang a, nomawi chawi tura beisei a ni zui dawn.

Two Star Lions!

National team-ten an jersey chung lamah 'star' (arsi) lem an dah ṭhin a, an duh zat zat an dah ngawt lo - champion ngun ber Brazil-in star panga an dah theih chhan chu vawi nga ngawt an champion tawh vang a ni a, a hlu hle.

'Three Lions' tia hminglem an pek England erawhin arsi pakhat chiah an la dah thei - hemi awmzia chu vawi khat chiah an la champion tihna a ni a, Borussia Dortmund, Paris Saint-Germain, Chelsea leh Bayern-a nomawi chawitu Tuchel-a'n hei hi thlak danglam a tum.

Kum 51 mi coach chuan, "Thla 18 atan project kan siam ho a, hei hi nomawi chawi leh tura kan ruahmanna hnuhnung ber a nih ka beisei," a ti - thla 18 chhungin world champion nih a tum a, mahse, a awlsam lo ang.

Tuchel chuan sawi zawmin, "January aṭanga World Cup thlenga England kaihruai tura ngaihtuahna ka siam khan ka phur nghal hle - hei hi he team kaihruai a, a tawp thlenpui tura ka duhna leh tuihalna nen a inmil a, star pahnih dan kan tum," a ti.

United aiah England

Tuchel hi season tawp ruala Bayern nen an inṭhen dawn khan, German club-in an thutlukna an sut a, an thlem leh. Mahse, Tuchel a cham duh lo a, a chhuak lui. Nipui khan Manchester United nen an indawr zui a, mahse, Red Devils neitu zinga mi Sir Jim Ratcliffe nen inhmu mah se English club sawmna hi a hnar.

Chelsea boss hlui chuan United aia England a thlan chhan sawiin, "John McDermott (FA Director) leh Bullingham te nen kan indawr khan thil a kal chak em em a, tlang takin engkim kan sawi nghal - thil dang ka ngaihtuah lo a, England enkawl ka duh a ni," a ti.

Tuchel chuan sawi zawmin, "England enkawl hi hna ropui tak a ni tih ka hrethiam thuai a, kan hnathawh apiang hi hna ropui ber a ni zel a, hna dang nena khaikhin ka duh lo. He hna ka thawh theih avang hian ka lawm a, football âtchilhtu ka nih avangin a hlimawm bik.

"England ka enkawl dawn avangin ka phur thar a, rawlthar ka nih lai thlengin min ngaihtuah let tir. Tumruhna leh beiseina nen engkim kan ti ang tih ring ula, inkaihhruaina nghet tak neiin, induhthusamte chu rang taka thlentir kan tum dawn a ni," a ti a, England fan-ten ring fan chungin Tuchel-a England an thlir e.