Aizawl FC-in mimal lawmman an hui hnem

Aizawl FC midfielder Lalthankhuma'n best player leh best midfielder chawimawina a dawng a, forward Lalbiakdika chu top scorer a nih bakah best forward-a thlan a ni a, captain Lalchhawnkima leh keeper Vanlalhriatpuia te chu best defender leh best goalkeeper-a thlan an ni bawk.

Tun season aṭanga awm ṭan emerging player of the season chu Mizoram Police rawlthar Michael Lalbiaksanga'n a dawng. Chawimawina hi kum 2004 leh a hnuai lam tan a ni. Mimal chawimawina hi Kuriz sponsor a ni a, Rs 5,000 leh trophy a keng tel.

Best Player hi...

MPL vawi 11 neih tawhah mi pakuain best player chawimawina an dawng tawh a, ṭum hnih dawng thei chu R. Malsawmtluanga leh Alfred Kemah Jaryan te an ni. MS-a hi MPL2-a Chanmari a champion pui leh MPL6-a Chhinga Veng a champion pui ṭumin best player-ah an thlang.

Liberian midfielder Alfred Kemah Jaryan hi chu I League-a Aizawl FC champion puitu captain kha a ni a, MP7 leh MPL8-a Aizawl FC a champion pui ṭumin best player a ni ve ve.

Best player-a thlan tawh mi dangte chu R. Laldanmawia (Dinthar FC), Lalramchullova (Aizawl FC), F. Lalrinpuia (Aizawl FC), Malsawmfela (Chanmari FC), Lalrinchhana Tochhawng (Chawnpui FC) leh H. Lalbiakthanga (Mizoram Police) te an ni. Player ṭha ber a thlante hi champion team veka mi an ni bawk.

A ṭha huangah TK-a

MPL-ah hian best player atan forward, defender leh attacking midfielder thlan a ni tlangpui ṭhin a, defensive midfielder aṭanga dawng thei an awm meuh lo. Season liam ta khan Kawnpui/Armed Veng midfielder H. Lalbiakthanga chuan Mizoram Police champion puiin defensive midfielder ni chunga best player-a thlan hmasak ber an ni.

Tun ṭuma thlanchhuah Lalthankhuma pawh hi defensive midfielder tho a ni a, Aizawl FC midfielder hi player ṭha huangah a tel tawh ang. Cherhlun tlangval hian season liam ta khan I League-ah ṭha takin a khel tawh a, hmabak a nei êng hle.

Aizawl FC midfielder TK-a chuan, "Nominee-a ka awm kha chuan best midfielder-te kha chu ka beisei ve a, best player chu ka beisei lo. Coach Victor hnuaia khelh a nuam a, min rintawk avangin ka lawm a, ka teammate-te khelhpui an nuam em em bawk," tiin Vanglaini a hrilh.

Tu nge TK-a chu...

Lalthankhuma hian football khel turin Cherhlun aṭangin kum 2016 khan Aizawl a rawn pan a, Police Academy zawmin thla thum vel a awm. MPL5 Under 18-ah Bethlehem Vengthlang tan khelin a champion pui.

Kum 2017-ah Aizawl FC academy a zawm a, thla hnih vel a awm hnuah Mohun Bagan academy a zawm a, kum 2019 thleng a awm. MPL8-ah khan Ramhlun North FC tan a khel a, hemi season hian Ramhlun North hi an relegate.

Covid-19 lai khan Kerala Premier League khelin Kerala United a zawm a, MPL9-ah Chhinga Veng tan khelin hemi season hian Mizoram tan Santosh Trophy a khel. MPL10 hmain Second Divisoin I League khel turin Gujarat club ARA FC a zawm a, Kolkata club Kolkata Customs-ah a khel bawk.

Season liam ta khan Aizawl FC a zawm a, a zawm tlai leh inhliam avangin khelhna hmun a chang bik lo. Season chawhnu lamah erawh midfield-ah hmun pawimawh a chang tawh a, MPL11-ah meuh phei chuan rinrawl a ni tawh a, best player ni thei turin a khel ṭha a ni.