LZ Juice MPL11 final kan nghak chhuak ta: Zanin dar 8:00-ah Aizawl FC Vs Mizoram Police
LZ Juice MPL11-ah champion lai Mizoram Police leh MPL league winner Aizawl FC te an inhmachhawn dawn a, zanin dar 8:00 hian RG Stadium-ah nomawi an inchuh ang.
Victor Lalbiakmawia kaihhruai Aizawl FC hian tun season MPL-ah hneh loh an la tawng lo a, I League club an nih bakah league-a hneh loh la tawng lo hmasa ber record an siam. Lalbiaksanga Colney hote hi MPL leh All India Police Meet champion lai an nih bakah I Day Football champion tura final-a Aizawl FC hnehtu an ni thung.
Nomawi duha tuihal
Aizawl FC hi MPL8 hnuah Mizoram chhunga football inelna sang berah an la champion leh lo a, kum 2019 hnuah nomawi an la chawi leh loh avangin tuna an squad-ah pawh Lalruatthara chauh MPL nomawi chawi tawh an kawl.
I Day Football final-ah Aizawl FC an vanduai tawh a, hei vang hian I League winner nomawi chawi tur pawhin an thawkrim lehzual. Victor-a hoten hneh loh nei loin MPL11 league winner nomawi an chawi ta ngei a, mahse an lawm a la kim lo, MPL11 nomawi an duh.
I League club hian I Day Football final zana thil thleng an theihnghilh lo ang. Police an hneh loh zawhah Aizawl FC technical area a reh ṭhap a, ruah hmi lo ngat se patling mit aṭanga mittui luang lai hmuh tur a awm ngei ang.
Aizawl FC tana an mittui hruk hulna ṭha chu Police hneha MPL nomawi chawi a ni. Victor chuan, "Phuba lak kan tum lo a, MPL nomawi chawi kan tum. Kan player-te kan ring tawk a, final khel turin kan inpeih tawh. Kum 2019 hnua kan la champion leh loh avangin nomawi chawi hi kan duh takzet a ni," tiin Vanglaini a hrilh.
Police nge nge
Chanmari FC-in MPL10 final-a Mizoram Police an hneh loh hnuah MPL nomawi vawi thum chawi tawh Lalsangzuala Hmar an la lut a, mahse I Day Football leh MPL11 semifinal-ah Mizoram Police an hmachhawn miau avangin an tum ram an thleng zo ta lo. Knockout stage-a Police danglamna an hria ang.
Mizoram Police hian Chanmari FC an hneh avangin inrintawkna a ngah sawt dawn a, final-a an hmachhawn tur Aizawl FC pawh I Day Football final-a an hneh hnu tho an ni. Lalbiaksanga Colney chuan, "Ka player-te hi an ṭha a, ka ring tawk. Player ṭhenkhat hi kum lamah an upa ve tawh a, kum 40 hnaih tawh pawh an awm. Mahse, an theihna ka hrechiang a, kum naupang zawkin an pawlh ṭha. Aizawl FC aiin kan chhiat zawkna ka hre lo a, hlauhthawhna pawh ka nei lo," tiin Vanglaini a hrilh.
BS-a hian MPL5-ah Bethlehem Vengthlang chu final a luhpui tawh a, tun ṭum hi MPL final vawi thum a khelhna tur a ni. Police-in BS-a an neih hnuah an la champion theih ngai lohna All India Police Meet leh MPL-ah an champion a, Aizawl FC laka inringtawk tur pawh an ni.
A hmuhnawm dawn
Aizawl FC-in goal khung tam ber Lalbiakdika an chhawr thei lo a nih chuan tlarhma a bil sawt dawn a, playmaker Samuel Lalmuanpuia dinhmun a chiang lo bawk. Zemabawk North pa Samuel hi ball sem thiam bik a ni a, a awm lo a nih chuan tlarhma lamin ball ṭha an hmu tlem sawt ang.
Chutihrualin C. Lalhriatpuia leh Augustine Lalrochana te goal khung zat belhkhawm pawh goal 17 a ni a, goal khung tur player an kawl tih chu a chiang. Tlarhnung lam pawh Lalchhawnkima hoin an khawng ṭha a, semifinal-a goal an chhuah loh bakah league round-ah pawh goal 10 chauh an chhuah.
Mizoram Police erawh an record aṭanga teh chi an ni lo a, final-a an ṭhat zia chu MPL10 leh kumin I Day Football final-ah a chiang. Boruak sanga nuam ti taka khel thei R. Malsawmtluanga, F. Lalrinpuia leh Lalfakzuala te an kawl a, final-ah pawh an theihna angin an khel chhuak thei ang.
