Vietnam hmaah India - tho thei tak maw?

Manolo Marquez hnuaia indinthar tum India chuan vawiin tlai dar 4:30 hian Vietnam nen friendly match an khel dawn a, Mizo player pali Lallianzuala Chhangte, Lalengmawia Ralte (Apuia), Edmund Lalrindika leh Lalrinliana Hnamte (Terina) te chu squad-ah hian an awm.

Blue Tigers hian World Cup qualifier-a beisei an phak loh hnuin coach Igor Stimac an ban a, coach langsar tak tak karah, Indian football hrechiangtu Manolo Márquez lam an hawi a, FC Goa coach hi ringtawk takin an ruai.

Mahse, Manolo hnuaia an match hmasa pahnihah India an chak zo lo - mahni mualah football ram tenau Mauritius chu 0-0 in an inhnehtawkpui a, Asian Cup-a 1-0 a an ngam loh hnu Syria chu 3-0 in an ngam lo bawk.

Manolo-a'n thutlukna huaisen thlak a siam zui a, Vietnam hmachhawn tur zingah Mohun Bagan fachuam Anirudh Thapa a ko tel lo. Spanish coach hian, "Vietnam hneh thei tura ka ngaih ka ko," a ti a, a thutluknaah a ding nghet tlat.

Mi thar Terina

India squad puan a nihin Lza leh Apuia te chu awm chiang saa ngaih an ni a, tun hnaiah Edmund-a'n a hmun a sawh rem mek bawk - a vawi khat nan Chennaiyin FC midfielder Terina koh a ni a, Dungtlang/Chanmari tlangval hi a hlim hle.

Marina Machans (Chennaiyin sawin) tan Terina hian league match thum an khelh tawhah bul a la ṭan vek a, a khel ṭha ṭhin viau bawk - midfield-ah an khingpui nen ball an inchuhin vawi 16 a hlawhtling a, vawi 12 ball a chhuhlet bawk.

Mahse, Terina dinnaah Apuia, Jeakson Singh leh Suresh Singh te an awm a, Mizo midfielder tan squad-a awm hmasak bera bul ṭan nghal a beiseiawm lo. Hetihrual hian Anirudh Thapa nek chhuaktu a ni tih theihnghilh lo la, bench aṭang tala luh erawh a beiseiawm.

Terina chuan, "Training kan nei ṭha a, player-te an ṭha tlang bawk a, ka hlawkpui khawp mai," tiin senior team zinga a awm ve ringawt pawh chu a tan hlawkna a nih thu Vanglaini a hrilh.

Lza a inpeih

AIFF Player of the Year-a a kum zawna thlan Lallianzuala Chhangte chu vawiin tlai inkhela bul ṭan chiang tura beisei a ni a, Mizo forward hian Vietnam hmachhawn tura an inpeih thu a sawi - khualmual a nih avangin a awlsam dawn lo.

Lza chuan, "Coach thar hnuaia khel tur an ni a, an pangngai khawp ang. Mahse, inkhel turin keini pawh kan inpeih a, chak ngei tumin kan bei ang," a ti a, kut ruaka lo haw an tum loh thu Vanglaini a hrilh.

Mumbai City captain Lianzuala chuan sawi zawmin, "Training pawh kan nei ṭha a, bei rim tak kan ni. A hmasa zawkah kha chuan a la ṭantir deuh a, tunah chuan coach duhdan ang ngeia kan khelhchhuah theih tawh ka beisei," a ti.

Lianzuala hian India tan match 40 khel tawhin, goal riat a khung tawh a, assist vawi hnih a nei tawh. Vietnam hmachhawn tur India squad-ah hian ani aia ram tana inlan tam chu goalkeeper Gurpreet Singh Sandhu (74) leh striker Manvir Singh (46) te chiah an ni.

Engtinnge India?

Blue Tigers hi engtin nge an inrem ang aw, tih chu zawhna awm thei a ni a, Manolo-a'n ISL-a FC Goa a rem dan leh India a enkawl hmasak match hnih aṭanga teh chuan 4-2-3-1 a hman a rinawm a, Blue Tigers-in fimkhur hmasak an thlan a rinawm.

India tan ṭum dang ang thoin Gurpreet chu si ban nghaktu a nih a rinawm a, tlarhnung laiah Bengaluru defender Rahul Bheke leh Anwar Ali inkawpin, mual sirah Subhasish Bose leh Nikhil Poojary te an ding thei ang.

Midfield-ah ram tana match 20 khel tawh Apuia chu bul ṭan chiang tura ngaih a ni a, Suresh Singh emaw Jeakson Singh nen an inkawp ang - Terina tan bench aṭanga luh chu beisei tur a ni rih.

Mual sir aṭanga nawr turin Lza leh Liston Colaco an awm a, tlarhmaah Manvir Singh emaw Farukh Choudhary mal tlatin, striker thlawp turin a hnung chiahah Brandon Fernandes a ding thei ang.

Vietnam dinhmun

India leh Vietnam hi tun hmain vawi thum an lo inhmachhawn tawh a, Blue Tigers-in vawi khat chiah hnehna an la chang. LG Cup 2004-ah khan Vietnam hian 2-1 in India an hneh a, October 2010 khan friendly match-ah 3-1 in an chak thung.

Team pahnih intawn hnuhnung ber chu September 2022 kha niin, Vietnam hi friendly match-ah vek 3-0 in an chak a, Blue Tigers tan theihnghilh daih tlak result a ni - vawiin tlaia Thiên Truong Stadium-a inkhelah Blue Tigers-in chak an tum ang.

Vietnam hi coach thar, South Korea international hlui Kim Sang-sik hnuaia khel tur an ni a, an coach ropui Park Hang-seo-a'n a chhuahsan hnuah Vietnam hian ngai an la awh thei rih bik lo. Sang-sik hoin vawiinah chak an tum dawn.

Mualneitu team hian hnehna chan an tum chuan tlarhmaah tawnhriat nei ṭha, ram tana goal 16 khung tawh Nguyen Van Quyet leh match 48-a goal 21 khung thei Nguyen Tien Linh ten mawhphurhna an lak ngam a ṭul dawn a, tlarhnungah captain Que Ngoc Hai chet ṭhat a ṭul dawn bawk.