England player thiam ber Cole Palmer

Chelsea attacking midfielder ṭha mi Cole Palmer hming a thang zel - England Men's Player of the Year (2023-24) atan thlan a ni a, Real Madrid midfielder Jude Bellingham leh Arsenal forward Bukayo Saka te a khum.

Palmer hian November 2023 khan ram tana a match hmasa ber a khel ve chauh a, tunah chuan English player 'hot' ber pawl a ni der tawh - ram tan match kua a khel a, vawi hnih chiah bul a ṭan thung.

Ram tan goal hnih khungin, assist vawi khat a nei a, June 2024 khan Bosnia and Herzegovina nena friendly match an khelhah ram tana a goal hmasa ber a khung a, a goal hnihna hi Euro 2024 final-ah khan Spain lakah a khung.

A chungnung ber

England player thiam ber hi mipui vote hmanga thlan a ni a, Palmer hi Bellingham leh Saka te nen chhawpchhuah niin, mipui duh ber chu Palmer a ni - a player khum pahnihten season liam ta an hman dan thlir ila, English midfielder nep lohzia a lang.

Kum 21 mi Jude Bellingham-a'n season hman zawh takah khan Real tan inelna hrang hrangah match 42 khelin goal 23 a khung a, assist vawi 13 a nei bawk. Real tan hian Champions League leh La Liga nomawi a chawi - England tan vawi 36 a inlan tawh a, goal nga a khung tawh.

England tan vawi 42 inlana goal 12 khungtu Saka hi season hnih a zawnin England Men's Player of the Year atan thlan a ni tawh a, a vawi thumnaah erawh Palmer a tluk ta lo. Arsenal forward Saka hian season hman zawh takah match 47 khelin goal 20 a khung a, assist vawi 14 a nei.

Palmer chu

Kum 22 mi Cole Palmer hian season hmasa ṭan dawn khan Manchester City chhuahsanin Chelsea hi pound maktaduai 40 chuangin a pan a, City tana khel phak lo a nih avangin tam takin Blues chu âtthlak taka sum tam tak sengah an ngai.

Mahse, a lo ni lo - Blues tan inelna hrang hrangah match 45 khelin goal 25 a khung a, London club a pan hma hian City tan match thum khel hmanin goal hnih a khung. Season hman zawh takah khan inelna hrang hrangah match 48 khela goal 27 khungin assist vawi 15 a nei.

Palmer hi tun season-ah pawh a vul leh tawh hle. Blues tan match kua khelin goal ruk a khung a, assist vawi nga a nei bawk. Premier League Young Player of the Season-ah thlan a ni bawk.

Thawnthu hlui

England player thiam ber hi kum 2003 aṭang khan thlan ṭan niin, a dawng hmasa bertu chu khatihlaia Manchester United midfielder David Beckham a ni a, Chelsea player zingah Palmer hi a dawng thei pathumna a ni.

Blues legend Frank Lampard chuan 2004 & 2005 khan a kum zawnin a dawng a, kum 2010 khan Chelsea fullback Ashley Cole chuan a dawng bawk. England pawna khel player zingah kum 2006 khan Bayern Munich midfielder Owen Hargreaves chuan a dawng a, ram pawna khelh laia he award dawng thei awmchhun a la ni reng.

Manchester United legend Wayne Rooney chuan dawng hnem berin, vawi li a dawng a, Lampard, Steven Gerrard, Harry Kane leh Saka ten vawi hnih ṭheuh an dawng bawk. United player-in vawi nga he award hi an dawng a, a dawttu Chu Liverpool (4), Chelsea (3) leh Tottenham Hotspur (3) an ni.