Harsa takin Gauff a chak

Coco Gauff chuan fiahna hautak a paltlang a, a kum zawnin China Open semifinal a lut ta - final lut tur chuan seeded 15-na Paula Badosa a hneh leh a ngai dawn a ni.

Ningani zan Diamond Court-a inkhelah, American nula Gauff hian Ukrainian player Yuliia Starodubtseva chu 2-6, 6-2, 6-2 in a hneh a, season a hman ṭha lo tak mai chu a tawp lamah khar ṭhat a tum.

Kum 20 mi Gauff hian tun season bik chu Grand Slam huanga final luh a nei miah lo, inelna ngaihhlut Paris Olympic-ah pawh third round paltlang zo loin a zinkawng a tawp bawk.

Guaff chuan, "Ka khelh dan kha duh ang thlap a ni lo a, ka khingpui khelh dan pawh ka thunun thei hek lo. Ka theih chhun chu ka rilru puthmang thunun kha a ni mai a, chu erawh chu ka ti hlawhtling thei a ni," a ti.

January thla khan Auckland-ah final a lut a, tunah final beiseina a nei ve leh ta chiah. Semifinal-a a khingpui tur Paula Badosa hian inkhel dangah Zhang Shuai chu 6-1, 7-6 (7-4) in a lo hneh ve thung.

Season tirah kha chuan Badosa hi world number 140 a ni a, tun hnaiah erawh nasa takin hma a sawn. May thla hnu lamah match 35 aṭangin vawi 28 a chak, world number 19 a ni hial tawh a ni.